Lokologa – Letšatši la 15

Morago ga sengwalwa mabapi le kabo ya ditšhelete ya Modimo go lapa le le bego le hloka, babadi ba mmalwa ba hlalošitše, ka diemeile, ditlhohlo tša bona ka tša maphelo, lenyalo, ditlhohlo lefelong la mošomo, kgatelelo ya ditšhelete le tše dingwe tše dintši. Na le wena o itemogela tlhohlo e bjalo lehono?

Go filimi, The Best Exotic Marigold Hotel, moraloki go tiragalo e nngwe o rile: “Dilo ka moka di tla loka mafelelong.” Mongwadi, Jerry Bridges le yena o bolela se ge a ngwala: “Matšatši a gago a thata ga se a mabe mo e lego gore a wela ka ntle ga kgaugelo ya Modimo. Matšatši a gago a makaonekaone ga se a mabotse mo e lego gore kgaugelo ya Modimo ga e hlokege.”

Modimo o tseba gabotse mo a yago ka bophelo bja gago. Ga go bothata bjo bo tlago go yena bjalo ka semaka. Ge o lebeletšane le ledimo lehono leo le sa nyakego go tloga, tseba gore Modimo o šoma o sa mmone. Morago ga ledimo le lengwe le le lengwe, letšatši le hlaba gape.

Paulose o kwešišitše se. Go 2 Bakorinte 12:9, o kgopetše Modimo go mo hlomola “phatša nameng ya gagwe”. Modimo o rile: “Kgaugelo ya ka e go lekane, gobane maatla a ka a tiile kudu mo go ba ba fokolago.” Paulose a araba: “Ka gona ke kgahlwa kudu ke go itheta ka mafokodi a ka, gore maatla a Kriste a tle a dule mo go nna.”

Na go na le tlhohlo ye e tšhošetšago go go nola moko lehono? Gopola, ga e wele ka ntle ga kgaugelo ya Modimo. A re retologeleng go yena. Ke ka nako ye mo re bago le nako ya go lebeletšana ka difahlego le Mmopi wa rena, moo re lemogago bogolo bja gagwe le maatla, le bokgoni bja go re phethela tšohle. Gopola, ge dilo di se gabotse, ga se mafelelo.