Lokologa – Letšatši la 11
Lokologa o thome go phela ka boemo bjo bo nepagetšego bja kgopolo
(Di)temana ya Bibele
DIEMA 18
Pesalome 141
JEREMIA 29
Pesalome 23
“Mo tlošeng!” kgoši a goeletša, morago ga go ahlolelwa lehu monna yo a bonwego molato pele gagwe. Kgoši o be a sa nyake go theeletša dikgopelo tša monna. Bahlanka ba gagwe ba thoma go goga monna ba mo ntšha ka phapošing.
“Kgoši,” monna yo a lego tlalelong a goeletša godimo ga legetla la gagwe, “ge o ka se mpolaye, ke tla dira gore pere ya gago, ye o e ratago kudukudu, e fofe nakong ya ngwaga!”
Batho ka moka ba makala ge kgoši a araba: “Ema, ke tla phethagatša kgopelo ya gago. Eupša gopola, ge ngwaga o ka fela gomme pere ya ka e sa fofe, o tla hwa.”
Morago ntlong ya monna, lapa la gagwe le be le tshwenyegilego le nyaka go tseba gore o tlo dira bjang gore pere e fofe. “Oh,” monna yo a nago le kholofelo a araba, “go tseba mang, kgoši ya go se loke mohlomongwe e ka hlokafala lenyaga, pere e ka hwa; goba mohlomongwe, mohlomongwe, ke tla e ruta go fofa …”
Na o lebeletše bophelo le ditlhohlo tša bjona ka dilense tše botse goba tše mpe? Na o a lemoga gore boitshwaro bja gago go bophelo bo na le khuetšo go kgetho ya gago ya mantšu, gomme mantšu a gago go seo o itemogelago sona bophelong bja gago? Go Diema 18:21 re bala gore: “Lehu le bophelo di laolwa ke go bolela ga motho.” Mopesalome o tsebile maatla a mantšu a gagwe, ka gona, a rapela go Pesalome 141:3: “Morena, o se ntese ke bolela tše di sego tša swanela, goba ke bolela ka lephakuphaku.”
Modimo o na le merero ya gore re atlege e sego ya tahlego (Jeremia 29:11). Go Pesalome 23:6 re bala gape gore: “Ke a tseba gore botho le lerato la gago di tla ba le nna bophelong bja ka ka moka, gomme ke tla dula ka ngwakong wa gago ge ke sa phela.”
Ka gona, ke a botšiša gapa: O bona ka dilense dife bolwetši bja gago, go se šome, mathata a ditšhelete, moswa yo a lego mahlalagading, Ienyalo le le robegilego, goba go lewa ke bodutu? Ekaba mantšu a gago a paka ka tumelo ya gago goba a go dira gore o be le kgateletšego le go feta? Na o bolela bophelo goba lehu?
A re lebeleleng go feta ditlhohlo tša rena le go bana, ka leihlo la rena la monagano, phodišo ya Modimo, monyetla wa mošomo go bao ba o hlokago, katlego, katlego ya ditšhelete, moswa yo a lego mahlalagading wa lerabele a etla go Modimo, lenyalo le le robegilego le tsošološwa gomme go bao ba nyakgo molekani, wa melaba Modimo o tla mo tliša go bona. Ga go se se palelago Modimo ge re dumela ka kgopolo ye e swanago ya monna yo a ahloletšwego yo a dumelago gore pere e tla fofa! Modimo a go šegofatše.
