Lokologa – Letšatši la 12

Pampiri ya ka ntlwaneng ya boithomelo goba thoye e mpsha ya lepelepele? Yeo e bile kgetho ya morwedi wa ka Joalé bošegong bjo bongwe nakong ya ge ke mo hlapiša, ge a be a na le dikgwedi tše 11.

Joalé o be a le kgatong ya gagwe ya go itemogela gomme ka lebaka le itšego, a thoma go rata pampiri ya ka ntlwaneng ya boithomelo. Ge a hwetša e tee, o be a lokela ka molomong wa gagwe – seo se be se mpelaetša! Bošegong bjoo, ge ke fihla ka phapošing ya go hlapela morago ga go tšea toulo, ke mo hweditše ka myemyelo e kgolo, a kgotsofetše ka seripagare sa pampiri ya ka ntlwaneng ya boithomelo ka letsogong la gagwe.

Go sa šetšwe maiteko a ka ka moka go mo tšeela yona le go lebiša šedi ya gagwe go thoye ya lepelepele e psha, ya mmala wa go taga, ke ile ka palela. O be a nyaka pampiri ya ka ntlwaneng ya boithomelo! Mafelelong (go kgaotša dikeledi tša gagwe), ke ile ka gapeletšega go mo lokela ka pafong ya go hlapela – le pampiri ya ka ntlwaneng ya boithomelo.

Gomme morago ka ema ke mo lebeletše a raloka ka pampiri ya ka ntlwaneng ya boithomelo yeo e bego e thapile, mola thoye e mpsha ya lepelepele e phaphametše godimo ga meetse, gwa fihla go nna: Gantši re dira ka mo go swanago bophelong bja rena bja semoya. Re rapelela karabo go boemo bjo bo hlohlago. Le ge Modimo a re araba, re palela ke go bona seo, ka lebaka la kgopolo ye re nago le yona ya ka fao a “swanetšego” go re araba ka gona. Goba re wela molabeng wa go tsepelela go tša morago gomme re lahlegela ke se Modimo a nyakago go se dira gona bjale.

Modimo, le ge go le bjalo, o šoma ka ditsela go feta ka mo re gopolago ka gona – gomme re swanetše re bulegele go seo. Nagana ka Moshe ge a be a swanetše go kgoma meetse a Lewatle la Mahlaka gore a kgone go bula tsela ka lewatleng; Joshua le Baisraele ba swanetše go sepela ga šupa go dikologa Jeriko pele ba letša diphalafala le go bona maboto a motse a ewa; goba Jesu a hlakanya mare le seretse, a tlotša mahlo a monna wa sefofu gomme a re a yo hlapa mahlo a gagwe. Monna wa sefofu o dirile ka ge Jesu a mo laetše gomme a fodišwa le semeetseng. Ka gobane Moshe, Joshua le Jesu ba be ba obamela Modimo, ba itemogetše maatla a gagwe.

Go re rena re itemogela maatla a Modimo maphelong a rena, le rena re hloka go obamela le go tshepha gore ka mehla o tseba bokaone. Go 1 Samuele 15:22 re bala gore: “Go kaone go mo theetša go na le gore o mo direle sehlabelo ka dikgapa tše kaonekaone.” Go Johanese 5:19 Jesu o rile: “Jesu ge a ba fetola a re: ‘Ruri, ruri, ke le botša gore Morwa wa Modimo a ka se kgone go dira selo ka boyena; o dira fela se a bonago Tate a se dira. Tše Tate a di dirago ke tše le nna, Morwagwe, ke di dirago.’ ” Gomme go Jesaya 55:8-9, Modimo o re: “Morena o re: ‘Megopolo ya ka ga e swane le ya lena, le ditsela tša ka di fapana le tša lena. Bjalo ka ge magodimo a phagame kudu ka godimo ga lefase, ka wona mokgwa woo ditsela le megopolo ya ka di ka godimo ga tša lena.’ ” Na o obamela Modimo, o tshepha yena ka tše kaonekaone tša gagwe?

Ke na le nnete ya gore ge morwedi wa ka a ka ba a tlogetše pampiri ya ka ntlwaneng ya boithomelo nakwana, a ka be a lemogile gore thoye ya lepelepele e be e loketše kudu tikologo ya go hlapa. Ge a be a kgona go bolela, o be a ka ba a nkgopetše go tloša pampiri ya ka ntlwaneng ya boithomelo ye e thapilego, ya diripa ye e bego e phaphametše godimo ga meetse ka lebaka la kgetho ya gagwe ya pampiri ya ka ntlwaneng ya boithomelo. Ke eng se se phaphametšego bophelong bja gago? Se tswalele mahlo ke pampiri ya ka ntlwaneng ya boithomelo mo o palelago ke go bona “thoye ya lepelepele ya go phadima” go boemo bja gago! Modimo a go šegofatše.