JOHANESE 13

₁Pele ga ge Monyanya wa Paseka o lewa ke ge Jesu a šetše a tseba gore nako ya gore a tloge mo lefaseng a ye go Tatagwe e fihlile. Ka mehla o be a be a rata ba gagwe ba mo lefaseng, gomme o ile a fela a ba rata go fihlela mafelelong.

₂Ge ba le dijong tša go lalela ke ge Sathane a šetše a thetsitše Judase, morwa wa Simone Iskariote, gore a eke Jesu. ₃Jesu yena o be a tseba gore Tatagwe o gafetše dilo ka moka diatleng tša gagwe; o be a tseba le gore o tšwa go Modimo gomme bjale o boela go yena. ₄A emelela ba le dijong, a apola seaparo sa gagwe, a tšea lešela a ipofa letheka ka lona. ₅A tšhela meetse ka lešapelong, a thoma go hlapiša barutiwa ba gagwe maoto, a a phumola ka lešela lela a ipofilego letheka ka lona. ₆Ge a fihla go Simone Petrose, Simone Petrose a mmotšiša a re: “Morena, na nna nka nama ka hlapišwa ke wena maoto?”

₇Jesu a mo fetola a re: “Gonabjale se ke dirago ga o se kwešiše, o tla se lemoga ka morago.”

₈Petrose a re: “Nna o ka se tsoge o ntlhapišitše maoto le ka mohla!”

Jesu a mo fetola a re: “Ge ke sa go hlapiše maoto, o ka se sa ba morutiwa wa ka.”

₉Simone Petrose a mo fetola a re: “Morena, gona se ntlhapiše maoto fela; ntlhapiše le diatla le hlogo!”

₁₀Jesu a re: “Yo a hlapilego mmele o hlwekile hlwekihlweki, gomme ga go nyakege gore a hlape gape a sa tšo hlapa, ge e se maoto. Lena le hlwekile, fela e sego ka moka.” ₁₁Ge a realo e be e le ge a tseba gore ke mang yo a tlilogo mo eka. Ke ka lebaka leo a rilego: “Ga se la hlweka ka moka.”

₁₂Ge a seno ba hlapiša maoto, a buša a apara seaparo sela sa gagwe, a boela madulong a gagwe dijong, gomme a ba botšiša a re: “Na se ke sa tšogo le dira sona le a se kwešiša? ₁₃Etse le mpitša Moruti le Morena. Gomme ge le realo le a rereša, ka gobane ke nnaena. ₁₄Bjale ge nna ke lego Morena le Moruti wa lena ke le hlapišitše maoto, le lena go a swanela gore le hlapišane maoto. ₁₅Gape ke napile ke le bontšhitše tsela gore le lena le tle le dire se ke le dirilego sona. ₁₆Ruri, ruri, ke le botša gore ga go mohlanka yo a fetago mong wa gagwe, le moromiwa ga a gona yo a fetago moromi wa gagwe. ₁₇Bjale ka gore šemo taba tše le a di tseba, ge le ka di phetha le tla be le le ba lehlogonolo.

₁₈“Ga ke re lena ka moka; gape ba ke ba kgethilego ke a ba tseba. Fela Mangwalo a Makgethwa a a rego: ‘Yo a jago le nna dijo o ntlhanametše,’ a swanetše go phethega. ₁₉Taba ye ke le botša yona gonabjale e sešo ya direga, gore mohla e direga le dumele gore ke ‘KE NNA’. ₂₀Ruri, ruri, ke le botša gore yo a amogelago yo ke mo romilego, le nna o a nkamogela; le yo a amogelago nna, o amogela le yo a nthomilego.”

₂₁Jesu ge a seno realo a ikwa a huduegile moyeng, gomme a bolela phaa a re: “Ruri, ruri, ke le botša gore yo mongwe mo go lena o tlilo nkeka.”

₂₂Barutiwa ba gagwe ba lebelelana, ba tlabilwe ke gore na o ra mang. ₂₃Yo mongwe wa bona, yo Jesu a bego a mo rata kudu, o be a dutše kgauswi le yena. ₂₄Simone Petrose a mo kgwatša, a re a botšiše Jesu gore na o ra mang.

₂₅Morutiwa yoo ke ge a sekamela go Jesu, a mmotšiša a re: “E ka ba ke mang, Morena?”

₂₆Jesu a mo fetola a re: “Ke yo ke tla rego go hlosa ka nthathana ya senkgwa ka mo nea.” Ka gona a tšea nthathana ya senkgwa, a hlosa morong ka yona, a e nea Judase, morwa wa Simone Iskariote. ₂₇Judase ge a seno tšea nthathana yeo, Sathane ke ge a mo tsena. Jesu a re go yena: “Se o se dirago itlhaganele o se dire!” ₂₈Ga go le o tee wa bao ba bego ba le moo dijong yo a ilego a kwešiša gore Jesu o mmoletšang bjalo. ₂₉Ka ge Judase e be e le yena a ba swarelago tšhelete, barutiwa ba bangwe ba Jesu ba ile ba hloma nke Jesu o mmoditše gore a ye go reka tše ba tlago di nyaka monyanyeng, goba a fe bahloki se sengwenyana.

₃₀Judase o rile go tšea nthathana yeo ya senkgwa a tšwela ka ntle. E be e le bošego.

₃₁Ge Judase a seno tšwa, Jesu a re: “Bjale ke gona batho ba tlilogo utollelwa letago la Morwamotho; ba tlilo utollelwa le letago la Modimo ka yena Morwamotho. ₃₂Gomme ge letago la Modimo le utollwa ka yena, gona Modimo o tla utollela batho letago la yena Morwamotho ka yena mong, a ba utollela lona gonabjale. ₃₃Bana ba ka, nka se sa ba le lena go iša kae. Le tla nnyaka, gomme gonabjale ke le botša se ke se boditšego baetapele ba Bajuda ka re: ‘Mo ke yago gona lena le ka se kgone go fihla.’ ₃₄Ke le fa molao wo mofsa, wa gore le ratane. Bjalo ka ge ke le ratile, le lena le rataneng. ₃₅Ge le ratana ke mo batho ba tlago tseba gore le barutiwa ba ka.”

₃₆Simone Petrose a mmotšiša a re: “Morena, o ya kae?”

Jesu a mo fetola a re: “Ga bjale mo ke yago gona o ka se ntatele, o tla ntatela ka moso.”

₃₇Petrose a mmotšiša a re: “Morena, gonabjale ke tla be ke šitišwa ke eng go go latela? Nna ke ikemišeditše le go go hwela.”

₃₈Jesu a re: “O ra gore ka nnete o ikemišeditše go nkhwela? Ruri, ruri, ke go botša gore pele ga ge mokoko o lla o tla be o ntatotše gararo.”