Khomotšo go tšwa Lentšung – Letšatši 7

₃₂Modimo yo o a ntiiša,

o nthuša go phela ke se na bosodi.

₃₃O nkgontšha go kitima bjalo ka tshephe;

o nkemiša ke fentše kua mebotong.

₃₅Wena, Morena,

o a ntšhireletša wa mpoloka;

o nthekga ka maatla a gago;

ka thušo ya gago ke na le seriti.

₃₆O nkgontšhitše go tšhabela manaba a ka,

gomme ga se ka thetšwa.

₁A ke rete Morena!

A ke tumiše leina la gagwe le lekgethwa ka pelo ya ka ka moka.

₂A ke rete Morena,

ke se lebale tše a ntirelago tšona:

₃O ntebalela makgopo a ka ka moka;

o mphodiša malwetši a ka ohle.

₄O ntlhakodiša lehung;

o a ntlhompha, a nthata, a ntšhokela.

₅Bophelong bja ka ka moka

o mpha tše botse ka bontši,

gore ke no fela ke tiile,

ke le yo mofsa bjalo ka ntšhu.

₁Ke tla go tumiša ka pelo ya ka ka moka, wena, Morena;

ke tla laodiša mehlolo yohle ya gago.

₂Ke tla thaba ka gobela ka lebaka la tše o ntiretšego tšona;

ke tla go opelela tumišo,

wena Yogodimodimo.

₆A go retwe Morena!

O nkwele ge ke mo llela ke nyaka thušo.

₇Morena o mpha maatla,

ebile ke kotse ya ka.

Ke botile yena, o a nthuša;

ka gona ke a gobela,

ke mo reta ka sefela.

₈Morena o fa setšhaba sa gagwe maatla.

Motlotšwa wa gagwe o tšhabela go yena mme a phološwa.

₉Phološa setšhaba sa gago, Morena,

o šegofatše bao e lego ba gago.

Eba modiša wa bona,

o ba babalele go ya go ile.

₁Lena badudi bohle ba lefase,

gobelelang Modimo ka thabo!

₂Opelelang go mo tumiša;

mo godišeng ka direto.

₃Botšang Modimo le re:

“Di gakgamatša bjang ditiro tša gago!

Ka lebaka la maatla a gago a magolo manaba a gago a ithapeletša go wena.

₄Batho bohle ba lefase ba a go khunamela,

ba go opelela direto,

ba go opelela ditumišo.” Sela

₅Etlang le boneng ditiro tša Modimo,

ditiro tše di makatšago a di diretšego batho:

₆O kile a gopiša lewatle gwa šala naga ya go oma.

Setšhaba sa gagwe se kile sa tshela noka ka maoto;

gona moo ra thabišwa ke se a se dirilego.

₇O buša go ya go ile ka maatla a gagwe.

Ditšhaba o di beile leihlo.

Diganka a di se mo tsogele maatla. Sela

₈Lena ditšhaba,

retang Modimo wa rena;

a go galagale ditumišo tša lena.

₉Ke yena yo a re phedišago,

gomme ga a re lese re thedimoga.

₁₀Modimo, o ile wa re hlahloba,

wa re hlwekiša boka silibera.

₁₁O ile wa re lesa re tanywa ke sefu,

wa re rweša morwalo wo boima.

₁₂Wa lesa batho ba re gataka godimo,

ra feta gare ga mollo le gare ga meetse,

fela wa re ntšha wa re hlakodiša.

₁₃Ke tla iša dihlabelo tša ditšhungwakamoka ka ntlong ya gago;

ke tla go phethela dikeno tša ka

₁₄tšeo ke go tshephišitšego tšona mola ke le tlalelong.

₁₅Ke tla go neela dihlabelo tša ditšhungwakamoka ka diruiwa tša manoni,

ka go tšhumela le dihlabelo tša dikgapa,

gomme muši wa tupa.

Ke tla go neela dihlabelo tša dipoo le tša diphooko.

₁₆Etlang le kwe,

lena bohle ba le boifago Modimo,

gomme ke tla le botša tše a ntiretšego tšona.

₁₇Ke mo lletše ka wa ka molomo,

ka mo tumiša ka tše ke di bolelago.

₁₈Ge nkabe ke be ke kgahlwa ke go nagana bokgopo,

Mong wa ka a ka be a ile a se ntheeletše.

₁₉Eupša ruri Modimo o nkwele,

o ntheeleditše ge ke mo rapela.

₂₀A go retwe Modimo yo a ilego a se gane thapelo ya ka,

goba a ntlhokiša leratorato la gagwe.

₁Nna Morena ke a mo rata, gobane ge ke mo llela o a nkwa.

₂Ke tla no dula ke mo rapela ge ke sa phela,

ka gobane o ntlhwaela tsebe.

₃Ke be ke rarilwe ke ditlemo tša lehu,

ke dikaneditšwe ke poifo ya bodulabahu,

ke tlaletšwe ke bile ke gakanegile.

₄Ke mo ke lletšego Morena ka re:

“Ke a go rapela, Morena, ntlhakodiše!”

₅Morena ke Mogaugedi ebile ke Moloki,

Modimo wa rena ke wa lešoko.

₆Morena o babalela ba ba sa kgonego go ithuša;

nna o mphološitše ke šetše ke itlhobogile.

₇A ke boele ke fole maswafo,

gobane Morena o ntoketše.

₈O ntlhakodišitše lehung,

a mphumola le meokgo,

a ba a mphefiša go kgopša.

₉Ke tla dula ke hlokometšwe ke Morena

ge ke sa le nageng ya ba ba phelago.

₁₀Tumelo yona ga se ya ka ya mphelela,

le mola ke ekwa gore bjale gona go padile.

₁₁Ge ke boifa bjalo, ka re:

“Motho wa nama yena ga a tshephagale!”

₁₂Morena ke tla mo leboga bjang ka lebaka la tšohle tše a ntiretšego tšona?

₁₃Ke tla mo neela seloba sa seno sa go mo leboga ka ge a mphološitše.

₁₄Ke tla phetha dikeno tša ka ke bonwa ke tšhaba sohle sa gagwe.

₁₅Lehu la ba ba botegelago Morena ga se taba ye nnyane go yena.

₁₆Mmalo, Morena,

ke nna mohlanka wa gago,

ke go hlankela boka mma yo a bego a go hlankela.

O ntlemolotše ditlemong tša lehu.

₁₇Ke tla go neela sehlabelo sa tebogo,

ka go rapela.

₁₈Ke tla phetha dikeno tša ka ke bonwa ke tšhaba sohle sa Morena

₁₉ka kgorong tša Tempele ya gagwe,

ke le ka gare ga gago,

wena Jerusalema.

Retang Morena!

₁Retang Morena!

Opelelang Morena sefela se sefsa;

opelang sereto sa gagwe le le phuthego ya ba ba mmotegelago.

₂Baisraele a ba thabele Mmopi wa bona;

ba Sione a ba gobele Kgoši ya bona megobo;

₃a ba mo rete ba opela;

ba mo opelele ba letša meropa le dikgapa.

₄Gobane Morena o kgahlwa ke tšhaba sa gagwe;

baikokobetši o ba godiša ka go ba phološa.

₅Ba ba mmotegelago a ba hlalale ba mo godiše;

a ba mo thabele ba le malaong a bona.

₆A ba mo rete ba goeletša,

ba swere tšhoša tša magalemabedi

₇go itefeletša go baditšhaba;

go otla merafe e šele,

₈le go bofa dikgoši tša bona ka diketane,

le babuši ba bona ka ditshipi,

₉le go ba otla ka mo go laetšego Modimo,

ya ba gona go godiša bohle ba ba mmotegelago.

Retang Morena!

₁Retang Morena!

Retang Modimo ka Ntlongkgethwa ya gagwe!

Mo reteng ka fase ga leratadima la gagwe le legolo!

₂Mo reteleng tše maatla tše a di dirilego,

mo reteleng maatla a gagwe a magolo!

₃Mo reteng ka diphalafala,

mo reteng ka diharepa le dikgapa!

₄Mo reteng ka meropa le megobo,

mo reteng ka dikwadi le dinaka!

₅Mo reteng ka masenkana a medumomebotse,

mo reteng ka masenkana a magolo!

₆Tšohle tše di phelago a di rete Morena!

Retang Morena!