Khomotšo go tšwa Lentšung – Letšatši 8

₄“Morena, ntsebiše pheletšo ya ka,

le gore nako ye e ntšhaletšego ke ye kaakang.

Ntemoše bokopana bja matšatši a ka.”

₅O mpeetše bophelo bjo bokopana;

bophelo bja ka o bona e se selo.

Motho wa nama ke lefeelafeela. Sela

₆Bophelo bja motho bo bjalo ka moriti wo o fetago;

tše a itapišago ka tšona ke lefeela.

O ikgobelela mahumo, a sa tsebe moji.

₇Bjale nna ke sa lebeletšeng,

Mong wa ka?

Yo ke mo holofetšego ke wena.

₁Nna Morena ke a mo rata, gobane ge ke mo llela o a nkwa.

₂Ke tla no dula ke mo rapela ge ke sa phela,

ka gobane o ntlhwaela tsebe.

₃Ke be ke rarilwe ke ditlemo tša lehu,

ke dikaneditšwe ke poifo ya bodulabahu,

ke tlaletšwe ke bile ke gakanegile.

₄Ke mo ke lletšego Morena ka re:

“Ke a go rapela, Morena, ntlhakodiše!”

₅Morena ke Mogaugedi ebile ke Moloki,

Modimo wa rena ke wa lešoko.

₆Morena o babalela ba ba sa kgonego go ithuša;

nna o mphološitše ke šetše ke itlhobogile.

₁Morena, ntlhwaele tsebe o nkarabe,

gobane ke mohlaki ebile ke mohloki.

₂Ntlhakodiše lehung,

gobane ke a go botegela.

₃Mphološe, nna,

mohlanka wa gago yo ke go botilego.

O Modimo wa ka,

ntšhokele, hle, Mong wa ka,

gobane letšatši lohle ke a go llela.

₄Nthabiše, nna, mohlanka wa gago,

gobane ke go hlolosetše kudu,

Mong wa ka.

₅Wena, Mong wa ka,

o yo botho, o wa go swarela;

bohle ba ba go rapelago o ba rata kudu

ka leratorato.

₆Hle, Morena,

ntheeletše ge ke go rapela;

nkele hloko ge ke go llela.

₇Ge ke le mathateng ke llela wena,

ka gobane o a ntheeletša.

₈Modimo, moswananago ga a gona,

Mong wa ka,

le wa go dira tše di dirwago ke wena ga a gona.

₉Ditšhaba tšohle, dihlolwakewena,

di tla tla tša go khunamela,

tša go hlompha, Mong wa ka.

₁₀Gobane o senatla, Ramehlolo;

ke wena fela o lego Modimo.

₁₁Morena, nthute tše o nyakago ke di dira,

gore ke phele ka nnete ya gago.

Ntlhahle gore ke go boife ka pelo ka moka.

₁₂Ke tla go tumiša,

wena Modimo, Mong wa ka,

ka pelo ya ka yohle,

ka go hlompha go ya go ile,

₁₃gobane leratorato le o nthatago ka lona ke le legolo,

mo o bilego o ntlhakodiša sekoting sa bodulabahu.

₁Morena Modimo, Mophološi wa ka,

ke go llela bošego le mosegare.

₂Ekwa thapelo ya ka;

ntheeletše ge ke go llela.

₃Ke wetšwe ke masetlapelo a mantši,

mo ke ilego ka ba kgauswi le lehu.

₄Ke balwa le ba ba theogelago go baithobaledi,

le maatla a mpheletše.

₅Ke bjalo ka ba ba lahlilwego gare ga bahu;

ke etša babolawa ba ba rapaletšego ka mabitleng,

ke swana le ba o se sa ba gopolago,

bao ba tšwilego pabalelong ya gago.

₆O ntahletše ka lebitleng fasefase;

o nkgohlomeditše ka sekoting sa leswiswi.

₇Kgalefo ya gago e a nkimela,

ke pipilwe ke mafula a yona.

₈O nkgaogantše le bagwera ba ka,

wa dira gore ba ntšhišingwe;

ke tswaleletšwe ka mo ke palelwago ke go tšwa.

₉Mahlo a ka a lapišitšwe ke matshwenyego;

ke go llela letšatši ka letšatši;

ke emiša matsogo ke go rapela.

₁₀Kgane ba ba hwilego o ba direla mehlolo?

Na bahu ba ka tsoga ba go tumiša?

₁₁Kgane leratorato la gago go bolelwa ka lona ka mabitleng,

goba yona potego ya gago kua tahlegong?

₁₂Na mehlolo ya gago e tsebja ka maswiswing,

goba yona toka ya gago nageng ya ba ba lebetšwego?

₁₃Morena, nna ke llela wena,

ke go rapela e sa le gosasa.

₁₄Morena, na o ntahlelang?

O reng o mphuralela?

₁₅E sa le ke hlaka go tloga bjaneng ka ba ka nyaka le go hwa.

O ntlaišitše ka tše di šiišago,

ke fedile.

₁₆Ke imelwa ke kgalefo ya gago;

ka ditlhaselo tša gago tše di šiišago o a mpheleletša.

₁₇Di mpotapota boka meetse letšatši ka moka;

di mpokanela ka mathoko ohle.

₁₈O nkgaogantše le bagwera le bakgotse,

gomme bjale wa ka mokgotse ke leswiswi.

₁Morena, nke o kwe thapelo ya ka,

mme sello sa ka se go fihlele.

₂O se iphihlele nna ge ke le tlalelong;

o ntlhwaele tsebe;

o se ntiegele ge ke go llela.

₃Bophelo bja ka bo fela bjalo ka muši;

mmele wa ka o fiša bjalo ka mollo.

₄Ke itlhobogile, ke ikwa ke omeletše bjalo ka hlaga;

ke feletšwe le ke tumo ya dijo.

₅Ke tsetlela godimo;

ke šetše ke le marapo fela.

₆Ke swana le leribiši la leganata;

ke etša makgohlo ka mašopeng.

₇Ga ke sa swarwa ke boroko;

ke bodutung go swana le nonyana tlhakeng ya ntlo.

₈Manaba a ka a hlwela go nthumola;

ba go nkgegea ba rogana ka nna.

_9-10Ka ge o mpefeletšwe o bile o nkgalefetše,

molora ke sona sejo sa ka,

seno sa ka se tswakane le meokgo,

gobane o ile wa ntopa wa ntahlela fase.

₁₁Matšatši a ka a go phela a etša meriti ye e theago;

ke pona bjalo ka bjang.

₁₂Eupša wena, Morena,

o buša go ya go ile;

setumo sa gago ke sa go sa felego.

₁₃O tla nanoga wa šokela Sione,

gobane ke nako ya go e gaugela,

ke nako.

₁₄Bahlanka ba gago ba kgahlwa ke maswika a yona;

ba a šokwa ge e phušogile.

₁₅Baditšhaba ba tla boifa Morena,

le magoši ohle a lefase a tla gakgamatšwa ke letago la gagwe.

₁₆Mohla Morena a tsoša Sione,

o tla tšwelela ka letago la gagwe.

₁₇O tla theeletša dithapelo tša bahloki,

a ka se di tšeiše phefo.

₁₈Tše di latelago a di ngwalelwe moloko wa ka moso,

gore tšhaba se se sa tlilogo hlolwa se tle se tumiše Morena:

₁₉Morena o lebelela fase a le bodulong bja gagwe bjo bokgethwa kua godimo;

o okamela lefaseng a le legodimong,

₂₀gore a kwe metsetlo ya dibofša,

le gore a lokolle baahlolelwalehu.

₂₁Ke ka lebaka leo a tlago begwa Sione,

a tlago retwa Jerusalema,

₂₂mohla ditšhaba le mebušo di phuthega gore di khunamele Morena.

₂₃Nna o nkamogile maatla ke sa le yo mofsa;

o mphokoleditše nako ya go phela.

₂₄Ke moka ka re:

“Hle, Modimo wa ka, o se ntšee ke sa le yo mofsa,

wena yo mengwaga ya gago e golago le meloko.”

₂₅Lefase e sa le o le thea kgalekgale,

le magodimo o a bopile ka tša gago diatla.

₂₆Ona a tla feta, fela wena o tla šala;

ohle a tla hlagala bjalo ka seaparo;

o a lahla boka seaparo sa leratha,

gomme a feta.

₂₇Fela wena o dula o sa fetoge,

le mengwaga ya gago ga e fele.

₂₈Bana ba bahlanka ba gago ba tla lotega,

le ditlogolo tša bona di tla no phela di na le wena.

₁Ke llela Morena ke goeletša,

ke re a nkgaugele.

₂Ke mmegela dillo tša ka tšohle,

ke mmotša mathata a ka.

₃Ge ke šetše ke nolega moko, o tseba se ke swanetšego go se dira.

Tseleng ye ke sepelago go yona,

manaba a ka a ntheile ka sefu.

₄Ge ke gadima ka thoko,

ke bona go se monthuši;

ga ke na botšhabelo,

ga ke na montšhetši.

₅Ke llela wena, Morena, ke re:

“O botšhabelo bja ka.

O wa ka, Morena,

ke le mo lefaseng.”

₆Ela sello sa ka hloko,

gobane ke feletšwe ke tshepo.

Ntlhakodiše go bantlhomari,

ka ge ba mpalela.

₇O nntšhe ka kgolegong,

gore ke tle ke go tumiše;

ke mo baloki ba tlago go bokanela,

ka ge o ntoketše.