Kholofelo e mpsha – Letšatši la 4

Sethunya se be se sa kwagala kgojana ge lešole le fihla go molefotenente. “Molefotenente,” a thoma, “mogwera wa ka ga se a boa kampeng go tšwa ntweng. Ke nagana gore o gobaditšwe. Ke kgopela tumelelo go yo mo lata.”

“Kgopelo ya gago e a ganetšwa, lešole,” molefotenente a goeletša, ka ntle le go nagana ka kgopelo. O be a sa nyake gore mašole a mangwe a bee maphelo a bona kotsing, go sa hlokege. Go tlaleletša moo, menyetla ya gore lešole le le lego ntweng le sa phela, e be e sesefetše.

Lešole, le ge go le bjalo, la se theetše taelo molefotenente gomme la boela morago ntweng go yo tšea mogwera wa gagwe. Tseleng ya go boa, a swere mogwera wa gagwe matsogong a gagwe, o gobaditšwe o šoro. Molefotenente o be a befetšwe kudu. “Ke go boditše gore mogwera wa gago o hlokafetše. Bjale ke lahlagetšwe ke bobedi bja lena”. O tšwetše pele ka kwelobohloko. “Mpotše, naa go be go le bohlokwa go tsenya bophelo bja gago kotsing ka lebaka la setopo?”

“Ee, molefotenente,” monna yo a hlokafalago a bolela ka myemyelo ye e fokolago. “Ge ke fihla go mogwera wa ka, o be a sa phela. Ge ke khunama kgauswi le yena, o mpoditše gore, ‘ke tsebile gore o tla tla.’ ”

Naa o mogwera yo ba bangwe ba ka mmotago. Go Diema 18:24 re bala gore: ‘Bagwera’ ba bangwe ba a lahletšana, ba bangwe bona ba tshephagala go feta bana ba motho. Gomme go Johanese 15:12-13, Jesu o rile: “Molao wa ka ke wa gore le rataneng bjalo ka ge le nna ke le rata. Lerato la go feta la ge motho a ka hwela bagwera ba gagwe ga le gona.”

A re direng ngwaga wo ngwaga wo re sa ipeelago thoko, eupša re thabele digwera tša rena. A re kgetheng bagwera ba ba nago le khuetšo e kaone maphelong a rena. O ka makatšwa ke ka fao Modimo a ka phethagatšago tše ntši maphelong a batho ba bangwe ka wena, gape le ka fao a ka bontšhago lerato la gagwe go wena ka bagwera ba go loka! Modimo a go šegofatše.