Kholofelo e mpsha – Letšatši la 3

Kelly-Bianca Holmes wa mengwaga ye tshela o lebeletše ka mahlo a bulegilego sehlopha sa batho ba ba bego ba fološa fenitšhara go lori ye e bego e eme pele ga flete ya bona. Bošego bjoo e be e tla ba bja pele morago ga nako e telele moo yena, barwarre ba gagwe ba babedi le tatagwe ba bego ba ka se robale godimo ga lepai le le phuthilwego le e bego e le matrase lebatong la bona la phapoši ya go robala e tee, eupša ba be ba tla robala godimo ga mpete wo o nago le matrase a nnete.

Tatago Kelly-Bianca o lekile ka mo a ka kgonago go mo hlokomela le barwarre ba gagwe ka mogolo wa gagwe o monnyane bjalo ka moleta dikgoro, morago ga ge mmago bona a ba tlogetše a yo ratana le monna yo mongwe. Morwalo wa boikarabelo bja gagwe, tšhelete ya tefelo ya sekolo ye e bego e sa lefelwe le tlhohlo ya gagwe ya letšatši le letšatši ya go ka bea dijo tafoleng e be e mo imela, gomme kholofelo ya gagwe ya bokamoso bjo bokaone e be e hwelela.

Rena, mo Radio Tygerberg 104FM Nkasehlakahlakeng sa Kapa, re kwele ka boemo bja bona nakong ya Protšeke ya Oasis. Ka protšeke ye, batheetši ba kgethile batho goba malapa ao ba bego ba itemogela “nako ya leganata” le dinako tše thata maphelong a bona. Gomme re rometše sehlopha e sa le mesong, nakong ya lenaneo la rena la mesong, go yo makatša lapa le itšego ka vautšhara ya go reka dijo. Go lapa le le hlokago, se e bile nako ya “sediba” leganateng la bona.

Re leboga bathekgi le batheetši ba ba neetšego go protšeke ye, gomme re kgonne go makatša lapa la Kelly-Bianca e se fela ka dijo, eupša gape ka mepete le fenitšhara e nngwe, le dimpho tša Krisemose tše re di hweditšego go tšwa go mokgatlo wo o kgoboketšago dimpho tša Krisemose tša bana. Go oketša moo, re kgonne go botša tatagwe ditaba tše botse tša gore tšhelete ya sekolo ye e bego e sa lefelwa e tla lefelwa ka mo go feletšego gomme tšhelete ya sekolo ya ngwaga o latelago e tla lefelwa e sa le pele ka mo go feletšego. Ditaba tše di bakile dikeledi tša lethabo.

Ka morago re hweditše gore Kelly-Bianca o be a kgopela makgolo wa gagwe le tatagwe, lebaka la dibeke, gore ba mo rekele popi e itšego ye a e bonego papatšong ya thelebišene. Ba be ba palla ke go e reka, gomme a rapela ka setu gore Modimo a mo fe yona. Go dimpho ka moka tša Krisemose tše di kgobokeditšwego, ye nngwe ya dimpho tše mokgatlo o re rometšego o sa tsebe go nea mosetsana, e bile popi ye Kelly-Bianca a e rapeletšego. Go be go sa tsebe motho, eupša Modimo ga se a lebala.

Bjalo ka ge Modimo a bile karolo ya se Kelly-Bianca a se nyakilego bophelong bja gagwe, o nyaka go ba karolo ya maphelo a rena. O tseba dikganyogo tša dipelo tša rena. Go Pesalome 33:13-14 re bala gore: Morena o lebelela a le legodimong, mme o bona batho bohle. Modimo ga a re bone feela, eupša gape o tseba dipelo tša rena. Go Ditiro 1:24 re bala gore: Ke moka ba rapela ba re: “Morena, wena o tsebago dipelo tša bohle …”

Ge o ikhwetša boemong bja tlalelo gomme o kgona go bolela le Modimo feela, se nolege moko. O tseba tlhohlo ya gago ya ditšhelete, pelo ye thata bjalo ka leswika ya molekani wa gago, kganyogo ya gago ya go ba le molekani goba ngwana, goba kganyogo efe le ge e le efe ye o ka bago le yona. Tšwela pele go mo tshepha. O tla go fa katlego ya gago ka nako ya maleba. Ke Ramaatlaohle gomme dilo ka moka go yena di a kgonega. Modimo a go šegofatše.