Kholofelo e mpsha – Letšatši la 5

Harry Vermaak, mootledi wa lori go tšwa Kapa Bohlabela, o tlogile Port Elizabeth morago ga bošegogare. Ka 02:00, o be a feta Leporogong la Van Stadens. Ge a bona koloi e tee godimo ga leporogo, o tsebile le semeetseng gore go na le se se fošagetšego. Mo ke bopaki bja Harry:

“Ke eme kgauswi le koloi leporogong gomme ka letša lenaka la lori makga a mmalwa. Ga go a ba le karabo go tšwa go mootledi. Go tšwa ka loring nakong yeo ya mesong go be go le kotsi kudu. Ka pelong ya ka, ke tsebile gore monna o nyaka thušo. Ke rapeletše tšhireletšo ya Modimo gomme ka tšwa ka loring.

Ka nako yeo, lebati la koloi la bulega. Monna yo a sehlefetšego wa mahlo a mahwibidu o tšwile ka koloing gomme a tla go nna gomme ka aparela ka poifo. Go be go bonala eka monna o na le meoya e mebe. Ke be ke nyaka go tsena ka loring eupša letšhogo la nkgolofatša.

‘O dira eng mo?’ Monna a botšiša. Modimo o nthomile gore ke tlo go phološa, ka araba. Monna a šikinya hlogo. ‘Aowa, ka iri ya 03:00 ke nako ye ke tlago tabogela fase go tšwa leporogong.’ Ke ile ka tšhoga kudu. ‘E ka ba e le nako ya gago, ke ikwele ke realo, eupša ga se nako ya Modimo. O nthomile gore ke tlo go thuša.’

Monna a khunamela ka koloing ya gagwe gomme a ntšha lengwalo la go ipolaya. Ke swere letsogo la gagwe gomme ka mmotša gore a lete nakwana … Ka yona nako yeo, founu ya gagwe ya thoma go lla. O mphile yona. Ka lehlakoreng le lengwe la founu, morwedi wa gagwe yo a bego a tlaletše o nyakile go tseba gore o kae. Ke mmoditše gore re eme godimo ga Leporo la Van Stadens, gomme tatagwe o ikemišeditše go tabogela fase. Ke netefaleditše mosadi gore ke tla founela maphodisa gomme ka fediša poledišano.

Ke kwešišitše maikutlo a monna a kholofologo. Mengwaga e mmalwa ya go feta, ke ikhweditše ke le boemong bjoo. Modimo le ge go le bjalo, a tsenelela a mphološa pele ke ipolaya. Ke anegetše monna kanegelo ya ka gomme ka mmotšiša ge e ba o rata bana ba gagwe. ‘Ke ba rata kudukudu,’ a araba. Potšišo ye e dirile gore a theoše maswafo nakwana gomme ke šomišitše monyetla woo go founela maphodisa. Morago ga metsotso e lesome, ba fihlile leporogong gomme ba sepela le monna go ya seteišeneng sa maphodisa.

Kua seteišeneng, dikeledi di be di elela difahlegong tša balapa la gagwe, bao ba bego ba letile gore a boe. Ke paletše ke go itshwara le nna ka lla. Ka nako yeo, ke lemogile gore Modimo o phološitše bophelo bja ka le go mpha kholofelo e mpsha gore, monna yo a robegilego, e ka ba sedirišwa letsogong la gagwe bošegong bjoo, go phološa bophelo bja monna yo mongwe.”

Harry o nepile. Modimo o rulaganya gore rena re atlege e se go re kweša bohloko. O nyaka go re nea kholofelo e mpsha dinakong tse thata. Go 2 Bakorinte 4:16-17 re bala gore: Ke ka lebaka la tšona taba tše ge re sa lape. Le ge mebele ya rena e hlagala, re tielela pelong letšatši ka letšatši. Gomme ditlaišego tše dinyenyane tša lebakanyana tše re di kwago tše, di tla re tlišetša letago la go ya go ile, le le fetago dilo tšohle.

Dinakong tše bohloko, tša leswiswi, Modimo o kgauswi kudu le rena. Se palele ke go mmona gomme wa lahlegelwa ka kholofelo. Bolela le yena. O tla go hlokomela le go dira gore o phele gape!