JOHANESE 15

₁“Ke nna morara wa mmakgonthe, gomme Tate ke molemi. ₂Lekala le lengwe le le lengwe le le lego mo go nna le sa enywe o a le rema, le lengwe le le lengwe le le enywago o a le kgotha, gore le hlweke le tle le enywe le go feta. ₃Lena le šetše le hlwekišitšwe ka tše ke le rutilego tšona. ₄Dulang le le ba tee le nna, gomme le nna ke tla dula ke le o tee le lena. Lekala ga le kgone go enywa ka bolona, le kgona fela ge le kopane le morara. Ka wona mokgwa woo le lena le ka se kgone go enywa dikenywa ge le sa dule le le ba tee le nna.

₅“Morara ke nna, makala ke lena. Yo a dulago e le o tee le nna, le nna ke le o tee le yena, o enywa dikenywa tše dintši, gobane ka ntle le nna le ka se kgone selo. ₆Yo a sa dulego e le o tee le nna o a lahlwa a omelela go etša lekala ge le lahlilwe la omelela; gomme makala a a omeletšego a a topša a lahlelwa mollong, a swa. ₇Ge le dula le le ba tee le nna gomme le theeletša tše ke le boditšego tšona, le ka kgopela se le se nyakago, mme le tla se fiwa. ₈Se se tumišago Tate ke ge le enywa dikenywa tše dintši ebile le le barutiwa ba ka.”

₉“Ke le rata bjalo ka ge Tate a nthata. Dulang le le ba tee le nna gore ke dule ke le rata. ₁₀Ge le phetha melao ya ka ke tla dula ke le rata, go swana le nna ge ke phethile melao ya Tate, gomme a dula a nthata.

₁₁“Ditaba tše ke le boditše tšona gore le be le lethabo le ke nago le lona, le gona lethabo la lena e be le le feletšego. ₁₂Molao wa ka ke wa gore le rataneng bjalo ka ge le nna ke le rata. ₁₃Lerato la go feta la ge motho a ka hwela bagwera ba gagwe ga le gona. ₁₄Gomme lena le bagwera ba ka ge le dira tše ke le laelago tšona. ₁₅Ga ke sa le bitša bahlanka, ka gobane mohlanka ga a tsebe se mong wa gagwe a se dirago. Lena ke le bitša bagwera ka gobane ke le begetše tšohle tše ke di boditšwego ke Tate. ₁₆Ga se lena le nkgethilego, ke nna ke kgethilego lena ka le dira gore le enywe dikenywa tša go swarelela, gore se le kago se kgopela Tate ka ge le le ba ka, a le fe sona. ₁₇Bjale ge, se ke le laelago sona ke gore le rataneng.”

₁₈“Ge batho ba lefase ba le hloya, tsebang gore pele ba be ba hloile nna. ₁₉Ge le ka be le le ba lefase, batho ba lefase ba ka be ba le rata, ba le tšea le le ba gabobona. Eupša ba le hloile ka ge ke le kgetholotše go bona gomme le se sa le ba gabobona. ₂₀Gopolang sela ke le boditšego sona ka re mohlanka ga a fete mong wa gagwe. Ge nna ba be ntlhomere, le lena ba tlilo le hlomara. Ge ba be ba phetha tše ke bego ke ba botša tšona, tše ba di botšwago ke lena le tšona ba tla di phetha. ₂₁Tšohle tše ba ntirilego tšona le lena ba tla le dira tšona ka ge le le ba ka, gobane yo a nthomilego yena ga ba mo tsebe. ₂₂Ge nkabe ke se tle ka bolela le bona, ba ka be ba se na molato; eupša bjale ga ba na se ba ka itatolago sebe ka sona. ₂₃Yo a ntlhoilego, o hloile Tate. ₂₄Ge nkabe ke se ka ka ka dira mediro mo gare ga bona ye e sego ya ka ya dirwa ke motho, ba ka be ba se na molato; eupša le ge ba di bone bjale, ba ntlhoile, le Tate ba mo hloile. ₂₅Fela go be go swanetše go ba bjalo, gore go phethege se se ngwadilwego ka melaong ya bona mo go thwego: ‘Ba ntlhoetše lefeela.’

₂₆“Ke tla re ke le go Tate ka le romela Mothuši, wona Moya wa go utolla therešo, wona wa go tšwa go Tate, gomme ge o fihla o tla ntlhatsela. ₂₇Le lena le tla ntlhatsela, ka gobane le bile le nna go tloga mathomong.