Kholofelo e mpsha – Letšatši la 12

Babadi ba go fapafapana ba iphetoletše go bopaki bja Corlea bjo a hlalošitšego ka fao Modimo a tsošolotšego lenyalo la gagwe. Mmadi yo mongwe o ngwetše: “Ga bjale ke ikhwetša ka gare ga boemo bjo bo hlohlago. Monna wa ka o nwa kudu. Ke tshwenyegile kudu, ka ge a be a sa nwe bjala ge ke kopana le yena megwaga e mentši ya go feta. Re bile kotsing e šoro ya sefatanaga moraganyana, ge a be a nwele dipilisi tše ntši. Ke boletše le Modimo ka bothata bjo, eupša go bonala eka ga ke amogele karabo. Ke tlalelong gomme ke lapišitšwe ke bophelo. Hle nthuše!”

Naa o ikwa bjalo ka mmadi yo, o lapile le go tšhošetša ke ditlhohlo tša bjale bophelong bja gago? Go ikhwetša ka gare ga boemo moo o tshephago Modimo, sammaletee go a boifiša, eupša gape ke lefelo le le lokollago lefaseng ka moka. Ka lebaka la eng? Ka gobane ge re lemoga gore Modimo a ka re nea katlego, re emiša go dira dithulaganyo tša rena le go mo dumelela go re bontšha bogolo bja gagwe.

Naa o file Modimo taolo ya bophelo bja gago le ditlhohlo goba o leka go itwela ka maatla a gago? Mantšu go 2 Bakorinte 12:9 a paka ka bokgoni bja Modimo go re maatlafatša dinakong tše boima: “Kgaugelo ya ka e go lekane, gobane maatla a ka a tiile kudu mo go ba ba fokolago.” Gomme go Jesaya 40:31, Modimo o holofetša gore: “Eupša bao ba tshephilego Morena ba tla lapologa ba se sa felelwa ke maatla, ba swana le dintšhu tše di akalalago. Ba tla kitima ba se lape, ba sepela ba sa fele maatla.” Gape go Bafilipi 4:6-7, Paulose o ngwetše gore: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

Naa o lahlegelwa ka kholofelo bophelong bja ggo? Ikgopotše gore Modimo ke Ramaatlaohle. A ka phološa bagwera ba gago ba ba lahlegilego le lapa la gago; a ka go nea bohlale go rarolla boemo bja gago bja ditšhelete. A ka tšea poifo ya gago gomme legatong la yona a go nea khutšo, ge o thoma go mo tshepha kudu gore a hlokomele ditlhohlo bophelong bja gago. Se kgopele fela Moya wo Mokgethwa go ba monamedi ka koloing ya gago, mo kgopele go ba mootledi – seo se ka dira phapano e kgolo kudu. Modimo a go šegofatše.