Kholofelo e mpsha – Letšatši la 13

Mathomong a ngwaga, ke boletše le mosadi yo bobotse bja gagwe le seriti se sebotse ka mehla ke di hlomphago. Nakong ye, le ge go le bjalo, hlase ya gagwe e be e se gona, gomme ka ipotšiša gore ke ka lebaka la eng. Ke maketše go kwa gore o hlokafaletše ke morwa wa gagwe, pele ga Krisemose, kotsing ya sefatanaga. O ngwetšwe ditlhahlobo tša gagwe tša marematlou gomme o mmolokile ka letšatši le go bego go tsebišwa dipoelo. Ge dikeledi di elela marameng a gagwe, ke eme ke sa bolele ka go makala pele ga gagwe. Naa ke botša eng motho yo a ka se tsogegego a gokarile morwa wa gagwe gape?

Letšatši le latelago, ke amogetše emeile go tšwa go mmadi a bolela ka fao, mosadi wa mengwaga ye 30, a fihlilego gae go hwetša setopo sa monna wa gagwe wa mengwaga ye 38. O hlokafetše ka lebaka la go kgahla ga madi pelong ya gagwe. Mantšu a gagwe mafelelong a emeile a nkgwathile kudu: “Mogwera wa ka wa hlogo ya kgomo, yo ke bego ke nyalane le yena mengwaga ye lesome, ke tšeelwa yena ka bjako gomme ke nyaka kholofelo ke tlaletše go ka tšwela pele le bophelo bja ka. Ke kgopela o nthuše!”

Ge motho a hlokafala, ka mehla go na le magoro a mabedi a batho. Bao ba šalago, ba leka go lebeletšana le bohloko le tobo ya bona, le sehlopha sa bobedi se se lekago go thekga le go homotša sehlopha sa pele, eupša ga ba na nnete ya tsela ya maleba ya go dira seo.

Go bao ba šetšego: Go tlwaelegile go itemogela maikwelo a go makatša, pefelo, go gana le go botšiša dipotšišo tše milione. Gape, go tlwalegile go lla go fihlela o robala, go se nyake go tšwa bolaong mesong e mengwe le go ipotšiša ge e ba bohloko pelong ya gago bo tla kaonafala.

Phodišo e tšea nako, eupša nako ya go lla e bohlokwa kudu. Ka gona, iphe nako ya go fola, eupša o hlokomele gore o se be le pefelo. Kgopela Modimo go go thuša gore o se lahlegelwe ke nepišo go se o sa nago le sona, ka go tsepelela kudu go se se go lahlegetšego.

Gomme gopola, o kgauswi le wena kudu go feta ka mo o naganago. Ge pelo ya gago e le bohloko, ya gagwe le yena e bohloko. Go Baheberu 13:5, Modimo o re: “Nka se tsoge ke le tlogetše, ebile nka se tsoge ke le lahlile.” Go Mateu 5:4 re bala gore: “Ba lehlogonolo ke bao ba llago, gobane Modimo o tla ba homotša.” Go Pesalome 34:18 Mopesalome o re gopotša gore: Morena o kgauswi le bao ba nolegilego moko; o phološa bao ba feletšwego ke tshepo.

Gaešita le ge o ka bolela lentšu “Jesu” o le gare o lla, dira bjalo. O kwešiša khuduego ya gago ka ge le yena e sa le a huduega kudu, ge a eme kgauswi le lebitla la mogwera wa gagwe Lasarose. Se ke ka lebaka leo a ithaopilego go gafa bophelo bja gagwe go rena, gore rena re amogele Moya wo Mokgethwa bjalo ka Mohomotši wa rena, yo ka mehla a re phedišago ditlhohlong tša rena le mahlokong!

Go bao ba nyakago go thuša: Setšo sa Bajuda se na le setlwaedi se se tsebjago ka “nako ya beke ya go ilela”. Ge motho a hlokafaletšwe ke motho yo a mo ratago, o tla ya ntlong ya gagwe. Go e na le go mo eletša, o tla homolela. O dula fela le motho yoo. Ge e ba o nyaka go bolela, o a fetola, eupša ke go ba gona ga gago o sa bolele selo mo go thekgago le go fodiša.
Gape, go e na le go botšiša ge e ba go na le seo o ka se dirago, o lebeledišiša dinyakwa gomme wa thuša. Go fa mohlala, ge bjang bo nyaka go repiwa, o ka dira seo. Ge go se na dijo ka ntlong, o ba išetsa dijo. Ge e ba ntlo e na le ditšhila, o a e hlwekiša goba o hwetša motho yo a ka e hlwekišago.
Gape, se lebale maatla a thapelo ya gago go lapa leo. E tla ba phagamiša le go ba thuša gore ba se lahlegele ke kholofelo nakong e mpe kudu ya maphelo a bona.

Le ge bohloko bja bjale e le bjo bogolo kudu, gopola gore ke bja nakwana. Go Kutollo 21:4 re bala gore: “O tla ba phumola meokgo yohle. Go ka se sa ba le lehu goba manyami goba dillo goba bohloko. Dilo tšela tša kgale di fetile.” Eka o ka itemogela maatla le bogona bja Modimo ka tsela e maatla lehono, o tseba gore a ka se tsoge a go tlogetše, ebile a ka se tsoge a go lahlile! Modimo a go šegofatše.