Kholofelo e mpsha – Letšatši la 10

Babadi ba bantši ba mpoditše ka mathata a bona ka manyalong a bona. Mo ke bopaki go tšwa go Corlea bjo bo ka go neago kholofelo e mpsha ge o na le mathata le wena:

Corlea: “Mo ke bego ke dutše gona, mathuding a ka morago ga ntlo, ke nolegile moko ge ke e kwa monna wa ka a tsena ka ntlong. Ke tsebile gore o fetile pareng pele a e tla gae. Go fihlela ka nako yeo, ke lekile tšohle ka maatla a ka go phološa lenyalo la ka. Seo ga se a šoma. Pelo ya ka e be e le bohloko moo e lego gore lenyalo la ka le be le fedile.

Mengwaga e mentši, monna wa ka le nna re phetše maphelo a leemaema re swaragane le mešomo ya rena, bana le mešongwana ya ka ntlong. Ka ge ke be ke lewa ke bodutu, ke lekile go laola le go fekeetša dilo ka moka le batho ka moka ba ke phelago le bona, go itira gore ke ikwe bokaone. Seo se kgarameleditše monna wa ka kgole le go feta.

Re ile Yuropa mmogo go leeto le ba bantši ba rilego ke leeto la bobedi le banyalani ba baswa. Le ge go le bjalo, ge re be re sepela ka ditoropong tše botse, re be sa boledišane. Go bile nako e bohloko. Re boile morago ka Afrika Borwa, gomme monna wa ka o hudugile a re o nyaka tlhalo. Ka morago o boile morago gae, eupša gwa se fetoge selo magareng ga rena.

Morago ga bošego mathuding, monna wa ka o hudugile gape. Ke be ke le tee. Dikeledi di elela marameng a ka, ke dutše mpeteng wa ka ka phapošing ya ka gomme ka bolela le Modimo. Ke mmoditše gore ke gana lenaba le tsena magareng ga rena le go laola lenyalo la rena. Ke be ke sa nyake go godiša bana ba rena ka lapeng le le robegilego, eupša ke be ke se sa na maano a go ka lokiša lenyalo la rena. Ka nako yeo, ke kwele eka Modimo o nkutolletše gore ntwa ya ka e be e se kgahlanong le madi le nama, eupša kgahlanong le Sathane le batemone ba gagwe. Ke ile ka swanela ke go tšea dibetša tša ka go lwa le lenaba le go le gopotša gore Jesu o šetše a fentše.

Ke thomile go bala dipuku tše mabapi le ntwa ya semoya. Motho yo mongwe o nneile puku ya Stormie Omartian, The power of a praying wife, ye e nthušitšego kudu. La pele bophelong bja ka, ke lemogile gore nka rapelela leboto la mollo go šireletša lenyalo la ka. Nka kgopela gape Modimo go fetoša se se bego se kwagala se le bose gore se galake go monna wa ka, gore a dire gore monna wa ka a hlologele Yena ka ntle le tlhalošo le gore o tla romela batho ba maleba tseleng ya monna wa ka go belela le yena.

Nna le monna wa ka re be re sa bonane gantši, eupša ge re kopana, ke be ke bona o ka re dithapelo tša ka ga di na seabe. Le ge go le bjalo, ke tšwetše pele go rapela. Letšatši le lengwe, ke theeditše kopelo ka mogobelo wa: “Ka letšatši le lengwe batho ka moka ba tla khunamela le go bolela gore o Modimo”. Ke letile go dumela gore yeo e be e le kholofetšo ye e tšwago go Modimo, ka monna wa ka, eupša ke be ke se na nnete ya seo. Ga ke a botša motho taba yeo, eupša ke tšwetše pele go theetša kopelo leboelela, ke mo rapelela. Ka moragonyana ga fa, moruti o nthapeletše nakong ya tirelo ya Sontaga. Morago ga go rapela, o rile, “Ke ikwa o ka re Modimo o go neile kopelo. O re o swarelele go mantšu a a kopelo.” Ke paletše ke go itshwara. Modimo ka nnete o kwele dithapelo tša ka. Ka thoma go rapela ka tumelo go feta pele.

Morago ga dikgwedi tše tshela morago ga ge monna wa ka a tlogile gae, o boile gae a re o nyaka go lokiša lenyalo la rena. Peelano ya ka e tee fela e bile gore re e dira le Modimo nakong ye. O dumetše gomme ra thoma tsela e mpsha mmogo. Nakong ye, o mpoditše ka batho ba Modimo a ba rometšego tseleng ya gagwe bao ba boletšego bophelong bja gagwe. Se se bego se kwagale se le bose, gateetee, se a galaka gomme ga a kgone go hlaloša kganyogo ya gagwe ya go ba le Modimo. Ke thabile kudukudu ka ge ke lemogile gore le ge go be go sa bonale gore dithapelo tša ka di na le maatla, lenaba, ge e le gabotse, le lekile go dira gore ke se rapele, eupša Modimo o kwele thapelo e nngwe le e nngwe gomme a di araba!

Lehono, megwaga ka morago, re sa thabile lenyalong la rena. Monna wa ke mogwera wa ka yo mokaonekaone gape. O a ntšhireletša nameng le moyeng, gomme ga ke na kganyogo ya go mo laola le go mo fekeetša. Moo ke bego ke le molwela ditshwanelo tša basadi gomme ke nyaka go bontšha ditokelo tša ka, bjale ke latela ditaelo tša Modimo go lenyalo la ka. Ke yona tsela e le noši ya go netefatša lenyalo le le thabišago. Ge ke hlompha monna wa ka, o tla ba le kganyogo ya go ntšhireletša. Gomme ge a ntšhireletša, ga ke nyake go mo fekeetša goba go mo laola.

Ga go retwe Modimo! O tsošološitše lenyalo la rena le le robegilego, a šireletša bana ba rena tshepetšong ye gomme bjale re a tseba gore ka nnete o sa dira mehlolo!”

Corlea o nepile. Ga go se se palelago Modimo. Go Jeremia 32:27 re bala gore: “Ke nna Morena, Modimo wa batho ka moka. Kgane go na le se se ntšhitago?” Ke le hlohleletša go tšwela pele go tshepha yena ka katlego efe goba efe ye o e nyakago. A ka se tsoge a le tlogetše, ebile a ka se tsoge a le lahlile! Modimo a go šegofatše.