Ke tla – Letšatši la 15

Dikeledi di be di ela marameng a gagwe moo a bego a dutše gona leroleng. Pelo ya gagwe e be e kwele bohloko. Kholofelo ya gagwe ya poelo, e be e fedile. O hweditšwe a otswa. Le ge a be a itshola ka ditiro tša gagwe, o be a tseba gore o na le molato, gomme ka go realo o swanetše ke go hwa.

Go ferošwa dibete le go lahlwa go se a se dirilego go be go bonala ka mahlong a bafarisei le boramangwalo. Ba bangwe ba bona ba be ba šetše ba swere maswika ka diatleng. “Moruti”, a kwa o tee wa bona a bolela le Jesu, “mosadi yo o swerwe a le gare a otswa. Mo molaong Moshe o re laetše gore basadi ba mohuta wo ba bolawe ka maswika. Bjale wena o reng?” Maria Magadalena o be a iname, pelo ya gagwe e kiba ka lebelo. Go bile le setu nakwana, gomme Jesu a bolela: “Yo a se nago sebe mo go lena a e be yena a thomago go mo foša ka leswika” (Johanese 8:7).

Go e na le gore Maria Magadalena a kgatlwe ka maswika, o kwele banna ba tloga ka o tee ka o tee – ba bangwe ba lahlela maswika fase. Ge ka moka ba tlogile, Jesu a inamologa gomme a mmotšiša: “Mmagorena, ba kae bona? Na ga go yo a go tšwilego?” A rothiša dikeledi, a sebaseba: “Ga a gona, Morena.” A dumela ka hlogo pele a tšwela pele: “Gona le nna ga ke go tšwe. Sepela, fela o se sa dira sebe” (Johanese 8:11).

Ba mmalwa ba rena ga re e se ra ba boemong moo re ikwetšego, bjalo ka Maria Magadalena, re jewa ke dihlong tša dipheto tše fošagetšego goba ditiro bophelong bja rena bja go feta. Ka dinako tše dingwe re fetoga ka nnete le go ipolela dibe le gaešita go tlogela go di dira, eupša re hwetša go le boima gore Modimo o re lebaletše ka nnate. Ka gona re tšwela pele go kgopela tebalelo ka go sa felego gomme ga re itemogele bophelo ka mo go feletšego. Lenaba le nyaka go re bea fao. Lega go le bjalo, Modimo o nyaka go re gopotša gore lehu la Jesu sefapanong le re lokolotše – ka mo go feletšego.

Go 1 Johanese 1:9 re bala gore: “Eupša ge re ipolela dibe tša rena, ka ge Modimo a phetha tše a re holofetšago tšona mme a dira tše di lokilego, o re swarela tšona, a re hlatswa bokgopo bjohle.” Go Pesalome 103:12 re bala gore: “Bjalo ka ge bohlabela bo tlogelane le bodikela, le rena o re tlogelanya le dibe tša rena.” Gomme go Jesaya 43:25 Modimo o re: “Le ge go le bjalo, nna ke Modimo yo a le swarelago dibe, gomme ke dira seo ka gobane ke nna Modimo wa kgaugelo. Nka se sa gopola dibe tša lena.”

Kopano ya Maria Magadalena le Jesu Kriste e fetošitše bophelo bja gagwe kudukudu. Nakwana ya kgaugelo ye e bego e sa mo swanela e dirile gore a mo latele go fihla lehung la Gagwe sefapanong. E bile motho wa pele wa go mmona morago ga tsogo ya Gagwe bahung. A re tsepeletšeng mahlo a rena go Modimo, re ikgopotša ka se Jesu a se dirilego sefapanong. Kgaugelo ya Gagwe e lekane go wena. Se lete nako e telele pele o ka itemogela bophelo bja tokologo le tše ntši tše a go lokišeditšego tšona. Modimo a go šegofatše.