Go sepela le Modimo – Letšatši la 7

Tša kgotlelelo ya Jobo le di kwele, gomme le tseba le ka mo Morena a ilego a mo hlakodiša melekong ya gagwe ka gona. Gobane Morena o tletše kgaugelo le kwelobohloko. Jakobose 5:11

Bibele e bolela ka tswalano ye Modimo a nago le yona le tlholo ya gagwe le go bontšha segwera se sebotse seo batho ba bantši go tšwa mafelong a fapafapanego a bophelo ba itemogelago sona le yena. Yo mongwe le yo mongwe o bopetšwe morero wa moswananoši, bjalo ka ge re le bjalo, gomme Bibele e bolela ka boemo bofe goba bofe bjo bo ka naganwago bophelong ka ntle ga go go dira o ka re batho ba phethagetše ka gare ga matlakala a yona, ka gona e re nea ditemogo tše di thušago ge re itemogela maemo a swanago.

“Mathomo a bohlale ke go boifa Morena; go tseba Mokgethwa ke yona temogo” (Diema 9:10) – se ke senotlelo sa rena ge re itemogela mathata le go felelwa ke kholofelo, re hloka thušo le go se be le kholofelo. Ge re se na molato, maemo a rena a le boima gomme batho ba ba ka re thušago ba le kgahlanong le rena, re hloka go lebelela tswalano ya rena le Modimo le go amogela bohloko bja rena go yena. Modimo ga a fetoge gomme o re nea kgetho ya go sepela kgauswi le yena boemong bjo bongwe le bjo bongwe.

Jobo o be a tsebja bjalo ka yo “a se nago bosodi … wa go boifa Modimo, gomme a sa dire tše mpe” (Jobo 1:1) gomme, le ge go le bjalo, o tlaišegile kudu. O ikhweditše ka gare ga boima bjo bo šiišago ka gobane, le ge a be a humile kudu, a šegofaditšwe ka bana ba bantši gomme “a humile go feta batho ba Bohlabela ka moka” (Jobo 1:3), o lahlegetšwe ke dilo ka moka ka tatelano ya ka pela. Le ge a be a nyamile kudu, tumelo ya gagwe go Modimo e mo phedišitše gomme a araba ka go tumiša: “Ke tlile lefaseng ke le fela, gomme ke tla tloga lefaseng ke le fela. Morena o be a file, mme bjale o tšere. A a retwe!” (Jobo 1:21). O tlaišegile ka “dišo tše šoro, go tloga ka monwana wa leoto go fihla ka hlogo” gomme keletšo ya mosadi e bile “rogaka Modimo o ikhwele!” (Jobo 2:9).

Re katana le go kwešiša se. Re ka kwešiša gore ka dikgetho tše mpe, motho a ikgogela magala hlogong, eupša re hwetša go le boima go kwešiša gore ke ka lebaka la eng batho ba ba “lokilego” ba tlaišega. Modimo o re bontšha gore o na le rena le go re aga dinakong tša tlaišego. Ga go yo a ka tšhabago, bjalo ka ge e le yena “yo a hlabišetšago baloki le bakgopo letšatši go swana, le pula a e nešetšago ba ba dirago tše di lokilego le ba ba dirago tše mpe” (Mateu 5:45). Ga se se se diregago, eupša ka fao re swaraganago le sona go lego bohlokwa. Ge re ipoletše le go fetoga go diphetho tše mpe tše re di dirilego, re tla imologa le go lokollwa go merwalo ya rena.

Modimo o leka semelo sa rena bjalo ka ge a lekile sa ga Jobo. Naa re ka tshepha le go hlompha Modimo ditlaišegong tša rena? “Na re ka amogela dilo tše dibotse go Modimo, tše mpe tšona ra di gana?” (Jobo 2:10)

Jobo o tshephile Modimo boemong bjo bo tseneletšego tlaišegong ya gagwe ka moka gomme Modimo a mmušetša ka mo go feletšego. Boitemogelo bja gagwe bo bontšha ka fao go tseba Modimo go lego bohlokwa kudu go feta go ba le dikarabo.