Go sepela le Modimo – Letšatši la 6

“Fela ka gobane mohlanka wa ka, Kalebe, yena ga a swane le bona, mme o ntatela ka pelo ya gagwe ka moka, ke tla mo fihliša nageng ye a tšwago go e lekola, gomme ditlogolo tša gagwe di tla tšea naga yeo ya ba ya tšona …” Numeri 14:24

Magareng ga Baisraele bao ba tlogilego Egepeta le Moshe, go be go na le motho wa tutuetšo a bitšwago Kalebe, yo ka morago a kgethilwego go ba yo mongwe wa dihlodi tše 12 tšeo di romilwego le Joshua go yo hlola naga ya Kanana. Dilo tše pedi di dirile gore a hlomphege setšhabeng, sa pele ke boitshwaro bja gagwe bja boemo bjo bobotse bja kgopolo, bja tshepo go lateleng Modimo.

Le ge dihlodi ka moka di boile morago ga matšatši a 40 kua Kanana, ka dikanegelo tše botse tša dikenywa tše ntši tše kgolo, le go bega gore ke naga “ya mokhora le monono”, yena le Joshua e bile bona ba babedi fela bao ba bego ba ikemišeditše go boela fao go yo thopa naga. Ba bangwe ba bontšhitše tumelo e nnyane go Modimo. Ba be ba boifa badudi ba fao gomme ba huetša gampe Baisraele ka pego ya bona ye e tšeago lehlakore: “Re bone le ditšitširipa fao, ditlogolo tša Anake. Re ile ra ipona re le ba bannyane bjalo ka ditšie, gomme le bona ba re bona re le bjalo” (Numeri 13:33). Bophelong, ge re itebelela go e na le go lebelela Modimo, ge ditlhohlo di etla di tla bonagala bjalo ka “ditšitširipa”, eupša tumelo go Modimo Ramaatlaohle, ge o lebeletšane le kotsi goba mathata, e re kgontšha go mo obamela.

Kalebe o tshephile Modimo go ba le bona; o be a nagana gabotse, a ikemišeditše a sa boife. O “ile a homotša batho bao ba ilego ba thoma go ngongoregelab Moshe a re: ‘A re napeng re ye re thope naga ya bona, ka gobane e ka se re palele’ ” (Numeri 13:30). Kalebe le Joshua ba begile gore: “Naga ye re tšogo e hlola ke naga ye botse kudu. Ge eba re kgahla Morena, o tla re iša go yona gomme a re fa naga yeo ya mokhora le monono. Le se ke la tsogela Morena maatla, le gona le se ke la boifa batho ba ba dulago moo. Re tla ba fenya gabonolo. Medimo ye e bego e ba šireleditše e ba furaletše, eupša rena Morena o na le rena; ka gona le se ke la boifa” (Numeri 14:7-9). Ba lemogile gore poifo ge e le gabotse ke sebe, ka gobane e be e ba šitiša go dumela gore Modimo o tla phethagatša kholofetšo ye le go ba nea tše ba di nyakago. Tumelo, le ge go le bjalo e tlišitše meputso e megolo.

Batho ba ba marabele, ba ba bonego bogona bja Modimo bo ba hlahla go ya Nageng ye e Holofeditšwego bjalo ka thololo ya mollo bošego (Eksodose 13:21-22), ba nyakile go kgatla Kalebe le Joshua ka maswika, eupša Modimo bjale o be a lahlegetšwe ke kgotlelelo ka ge ba be ba mo leka, makga a lesome nakong ya leeto. O iponagaditše go Moshe gomme a re, “Ke enne ka re ke tla le dudiša nageng yela, fela le o tee wa lena a ka se dule moo, ge e se Kalebe le Joshua. Le boletše gore bana ba lena ba tla thopša, eupša nna ke tla ba goroša nageng yeo le e gannego, gomme e tla ba ya bona. Fela lena le tla hwela mo lešokeng le. Bana ba lena ba tla ralala le lešoka bjalo ka badiši mengwaga ye masome a mane, ba tlaišega ka lebaka la go se botege ga lena, go fihlela ge wa mafelelo wa lena a ehwa. Bjalo ka ge le ile la hlola naga matšatši a masome a mane, le tla otlelwa sebe sa lena mengwaga ye masome a mane, letšatši ka le tee le emela ngwaga. Le tla tseba gore go lwa le nna go ra eng! Ke ena gore ke tla le otla ka mokgwa wo, lena setšhaba se sebe le kgobokanetšego go lwa le nna. Ka moka ga lena le tlilo hwela gona mo lešokeng le. Ke realo, nna, Morena.’ ” (Numeri 14:30-35). Pheletšo e sehlogo – ye e tlago kgethwa bakeng sa tokologo le go e senya.

Selo sa bobedi sa go kgahliša ka Kalebe ke gore ga go selo se se paledišitšego boitshwaro bja gagwe bjo bobotse. O be a sa ngongorege ka kotlo ya mengwaga ye 40 ya go diega pela a ka tsena Nageng ye e Holofeditšwego, yeo le yena a bego a swanetšeg go e kgotlelela, eupša ka morago o kgonne go bolela ka a fentše, “Fela bjale, bona. Ke mengwaga ye masome a mane a metšo ye mehlano ge Morena a boditše Moshe taba yeo. Ke mehleng yela Baisraele ba be ba sa putla lešoka, gomme Morena o mphedišitše go fihla bjale bjalo ka ge a boletše. Ntebelele! Ke na le mengwaga ye masome a seswai le metšo ye mehlano, gomme le lehono ke sa na le maatla go no swana le mohlang wola Moshe a nthoma. Ke sa tiile mo e lego gore nka ya ntweng, goba ka dira se ke se ratago. Bjale ge, mphe naga ye ya dithaba yeo Morena a nkholofeditšego yona ka letšatši lela rena le dihlodi tšela tše dingwe re begela Moshe tše re di bonego. Wena ka noši o bone gore morafe wa ditšitširipa wo o bitšwago Baanake o dula fao, metseng ye megolo ye e ageleditšwego ka merako. Mohlomongwe Morena o tla ba le nna mme ka ba leleka, bjalo ka ge a boletše” (Joshua 14:10-12). Wo ke moya wo o sa fenywego wa tumelo wo Kalebe a bilego le wona go hwetša gape maatla a gagwe le mafolofolo, le go hwetša moputso wo kgale a bego a o letetše.