Go sepela le Modimo – Letšatši la 4

“Mohlang woo yo a tlago be a le godimo ga ntlo ya gagwe, a se ke a fologela ka ntlong go yo tšea thoto ya gagwe; le yo a tlago be a le mašemong a se hlwe a sa boela gae. Gopolang se se ilego sa hlagela mosadi wa Lota!” Lukase 17:31-32

Ka mo go makatšago, Jesu o bolela ka mosadi wa Lote, eupša mantšu a gagwe mabapi le yena ke temošo go batheeletši. Temaneng ye e latelago, o tšwela pele, “Yo a ipabalelago o tla lahlega, eupša yo a itatolago o tla phelela sa ruri.” Setatemente se ka re makatša go fihlela re se bona se bontšha pheletšo ya mosadi wa Lote, yo, ka go gadima morago, a hlokafetšego.

Kanegelong ya Genese, mosadi wa Lote o bolelwa la pele ge barongwa ba ngangišana le Lote go tšwa motseng wo o ahlotšwego le mosadi wa gagwe le barwedi ba gagwe ba babedi, pele go e ba ka morago ga nako. Ka mo go makatšago, ga a itlhaganele, le ge a kwele ditaelo tša barongwa; o bone gape barongwa ba phološa Lote ka go mo gogela ka ntlong le go fetoša banna difofu. O tsebile gape gore Lote o ile go bakgonyana ba gagwe go yo ba lemoša gore ba tšhabe le bona.

Go sa šetšwe bohlatse bjo ka moka le temošo ya kahlolo ye e tlago ya Modimo, ga se a šetša ditaelo tša barongwa ge ba re, “Tšhabang le iphološe! Le se ke la lebelela morago goba la ema ka moeding. Le tšhabeleng dithabeng gore le se ke la tla la bolawa” (Genese 19:17). Eupša mosadi wa lote a retologa go gadima morago go bona tshenyo gomme a fetoga mmoto wa letswai. O bile le monyetla go tšhabela phedišo ya motse – kgetho e bile ya gagwe – eupša, bjalo ka Lote, o be a hloile go tlogela boiketlo bja gagwe, manobonobo le botumo. Le ge a be a se a amogela ditumelo tša Lote, bjalo ka modudi wa Sodoma, mogau wa Modimo o katološeditšwe go yena, Lote le balapa la bona ka lebaka la tswalano ya Lote le Modimo.

Modimo ka mehla o dira se a rilego o tlo se dira, eupša fao re bona Modimo a ahlola ka mogau. O bontšha kgotlelelo ye e makatšago go phološa batho ba mmalwa go e na le baloki ba lesome motseng o kgopo; mefelelong, le ge go le bjalo, ga a phološe yo a sa nyakego go phologa. Ka gona, re boela go temošo ya Jesu, “Gopola mosadi wa Lote!”