Go sepela le Modimo – Letšatši la 3
Go sepela le Modimo – bohlokwa bja go tsepelela: Lote
(Di)temana ya Bibele
BAFILIPI 2
Tagang bjalo ka dinaledi
Barategi, ka ge le be le ntheeletša ka mehla mola ke sa na le lena, gonabjale ge ke le kgole le lena, le swanetše go ntheeletša le go feta. Dulang le katanela phološo ya lena ka tlhompho le poifo, gobane go rata go phetha thato ya Modimo ga lena, le go kgona go e phetha le go dirišwa ke yena. Bafilipi 2:12-13
Batswadi gantši ba laela bana ba bona, bakeng sa tšhireletšo ya bona le go pheleng gabotse ga bona, gore ba itshware gabotse ge ba tlogetšwe ba nnoši gomme Paulose, bjalo ka motswadi, ka mo go swanago o laela Bafilipi. O a tseba gore go bohlokwa go motho go ka dira diphetho tša go ikema tša maleba tša go iphediša le phološo, le gore motho yo mongwe le yo mongwe mafelelong o šikara boikarabelo bja dikgetho tša gagwe.
Tabeng ye, ge re lebelela bophelo bja Lote go ka bonala go sa kwešišege, ka ge a phetše le go phološwa kgalekgale pele ga Paulose, ka gobane ke Jesu yo a dirišago boemo bja Lote bjalo ka mohlala go hlaloša se se tlago direga ka letšatši le a boago ka lona (Lukase 17:28-32), re tšeela godimo bohlokwa bja go kwešiša merero ya Modimo bophelong bja Lote bjo bo sa phethagalago.
Lote o be a swana le rena kudu: motho yo a phelago bophelo le ditšhegofatšo tša bjona, mathata le dikgetho. Ge a fiwa kgetho ya pele ya naga ke Abrahama, Lote o kgethile kholego ya gagwe. “Ke moo Lote a ilego a lealea, gomme a bona gore moedi ka moka wa Jordane go fihlela Tsoare o na le meetse a mantši, go swana le serapa sa Morena … Lote a ikgethela moedi wa Jordane ka moka mme a leba thoko ya bohlabela” (Genese 13:10-11). Eupša o be a sa lemoge naga ye a e kgethilego mme “a hloma mešaša kgauswi le Sodoma” moo badudi “e be e le ba babe, mme ba fošetša Morena kudu.” (Genese 13:12-13)
Le ge a atlegile fao ka dikgwebo le go ba modudi yo a tumilego, kgetho ya gagwe e mo dirile gore a ikhwetše ka mehla a le tikologong ya sebe, yeo gannyane e fifaditšego ditekanyetšo tša gagwe. O be a ikemišeditše go gafa barwedi ba gagwe ba dikgarebe ge banna ba motse ba nyaka go robala le barongwa ba babedi bao ba bego ba le ka gare ga ntlo ya gagwe, bao Modimo a ba romilego go yo fediša Sodoma.
Ka mo go sa makatšego, o hloka go potego go banna: “Re šuthelele, mofaladi tena! O mang wena o ka re botšago se re swanetšego go se dira?” (Genese 19:9) gomme le bakgonyana ba gagwe gape: “Itlhaganeleng le tšweng mo; Morena o tlile go fediša felo fa.” Eupša bona ba gopola gore o a swaswa. (Genese 19:14)
Le ge a be a tlamegile go dira sephetho se bohlokwa sa go sepela, o gomaretše seo a bego a swanetše go se tlogela, a tantšwe ke lehumo le go kwanantšha; go bile fela kgaugelo ya Modimo ye e mo ubutšego le lapa la gagwe gore ba se fedišwe. “Lote a fela a diega. Le ge go le bjalo, Morena a mo šokela; ka gona banna bao ba ba tšea ka matsogo, yena le mosadi le barwedi ba gagwe ka babedi, mme ba ba ntšha motseng.” (Genese 19:16)
Se ga se mafelelo a kanegelo. Le ge Lote a tšhaba, ka gobane Modimo o mo kgotlelela kudu, ka morago go molaleng gore dikgetho tša gagwe di mo tlogela ka bophelo bjo bo makatšago. Se se kgahlišago ke kgaugelo ya Modimo ka mehla le ka fao a sa dirago merero ya gagwe ye mmotse ka gare ga maphelo a rena ao a nago le diphošo. A se se re hlohleletše ge ka boikokobetšo re rulaganya phološo ya rena.
