Go sepela le Modimo – Letšatši la 18

“A bjale na motse wo wo mogolo wa Ninibe, nka napa ka se o kwele bohloko le go feta? Etse e bile motse wo o nago le bana ba ba se nago molato ba go feta ba dikete tše lekgolo le tše masome a mabedi, le diruiwa tše ntši?” Jona 4:11

Eupša Jona yena a itokišetša go ya Tarshishea go tšhabela Morena. A ya Jafo, moo a ilego a hwetša leselawatle leo le bego le šetše le itokišeditše go ya Tarshishe. A napa a lefela leeto mme a namela le basepediši ba leselawatle leo go leba Tarshishe, moo a bego a tla ba kgole le Morena. Jona 1:3

Re ka ikwa re tšhogile go nagana ka moprofeta yo a tšhabelago Modimo le mohlomongwe go makala go nagana gore ge e le gabotse a ka tšhabela Modimo, eupša seo ke se Jona a se dirilego, ka go se obamele taelo ya Modimo go ya Ninibe, go yo bega ebangedi kgahlanong le bobe bja batho fao. O tšere tsela ye e fapanego go ipelaetša kgahlanong le mošomo wa gagwe gomme a namela sekepe go ya Tarshishe. Le ge go le bjalo, o nyaditše maikemišetšo a Modimo go fihlelala merero ya Gagwe le kgotlelelo ya Gagwe le bahlanka ba go rata go dira dilo.

Jona o ikhweditše ka gare ga boemo bja go šiiša ka go leka go efoga pitšo ya Modimo. Modimo o rometše ledimo le maatla leo le bego le tšhošetša go senya sekepe, go fihlela ge Jona a bolela gore ke ka lebaka la gagwe gore ledimo le be gona gomme a ba kgodiša gore ba mo lahlele ka meetseng. Se se dirile gore ledimo le kgaotše, eupša e se go Jona. Ka meetseng, Jona o meditšwe ke hlapi ye kgolo gomme a dula ka mpeng ya yona matšatši a mararo le mašego a wona, gomme a kgona go kwešiša gore leano la gagwe la go tšhaba le paletše. A lebeletšane le lehu, Jona a boelwa ke kgopolo; a sokologa le go rapela: “Ge ke ekwa gore moya wa ka o nyaka go tšwa nameng, ka go gopola, Morena, ka go rapela, mme wa nkwa … Eupša nna ke tla go opelela ditumišo; ke tla go direla sehlabelo, mme ka phetha seo ke go tshephišitšego sona. Tlhakodišo e tšwa go Morena” (Jona 2:7-9; go thapelo ye e feletšego, bona Jona 2:1-10). Ka taelo ya Modimo, Jona o hladitšwe lebopong gomme a ya Ninebe. Ka dinako tše dingwe, batho re hloka mathata go hlakiša kgopolo ya rena.

A botegela lentšu la gagwe, Jona o begile ebangedi ka kahlolo ye e tlago ya Modimo go motse ka katlego e kgolo, ka ge kgoši le semeetseng e tsebagaditše go itima dijo ga tshokologo moo e lego gore diphoofolo di be di akeretšwa. O laetša batho ba Ninibe gore ba “lese dilo tše mpe le diphošo tšeo a di dirago” (Jona 3:8) gomme ge “Modimo a bona seo ba se dirilego, gore ba tlogetše tše mpe tše ba bego ba di dira. Ka fao a buša pelo a se ke a ba otla, le ge a be a itše o tla ba otla” (Jona 3:10). Go se swane le se re se naganago, Jona o be a sa thabe ge batho ba dikete tše lekgolo le masomepedi ba phološwa go phedišo ka mogau wa Modimo le molaetša wa gagwe; go e na le moo, “Taba ye ya tlatša Jona pelo mme a galefa. Ka gona a rapela a re: ‘Ga ke re pele ga ge ke tloga nageng ya gešo se ke sona se ke ilego ka gopola gore o tlilo se dira? Ke ka lebaka le ke ilego ka thoma ka go leka go tšhabela Tarshishe. Ke be ke tseba gore o Modimo wa lerato le kwelobohloko, gore o na le pelo ye telele, o yo botho, le gona o dula o itokišeditše go buša pelo, mme wa se otle.’ ” (Jona 4:1-2)

Go boima go kwešiša ka fao Jona a ka se bego le kwelobohloko go batho ba gabo, ge a be a na le temogo ye botse ya kgaugelo ya Modimo gomme a itemogetše phološo morago bjale. Le ge go le bjalo, ge re itebelela, re lemoga gore, gantši, maitshwaro a rena ga a kaone go feta a gagwe. Re hloka go ipotšiša ge e ba ka nnete re na le taba le pheletšo ya ba bangwe le ditaelo tša Modimo go rena (Lefitikose 19:18; Mateu 7:12). Boitshwaro bja lehloyo bja Jona bo be bo le molaleng, eupša bja rena bo ka ba bo utilwe.