JONA 4

₁Taba ye ya tlatša Jona pelo mme a galefa. ₂Ka gona a rapela a re: “Ga ke re pele ga ge ke tloga nageng ya gešo se ke sona se ke ilego ka gopola gore o tlilo se dira? Ke ka lebaka le ke ilego ka thoma ka go leka go tšhabela Tarshishe. Ke be ke tseba gore o Modimo wa lerato le kwelobohloko, gore o na le pelo ye telele, o yo botho, le gona o dula o itokišeditše go buša pelo, mme wa se otle. ₃Bjale ge, Morena, hle, ntese ke ikhwele. Go kaone ge ke hwile, ke sa phele.”

₄Morena a mo fetola a re: “A o bona go lebane gore o befelwe?”

₅Jona a tšwa motseng a dula fase ka thoko ya bohlabela, a itirela mošašana mme a dula moriting wa wona, a letetše go bona seo se tlago hlagela Ninibe. ₆Ke moka Morena Modimo a mediša mokhure gore o direle Jona moriti a tle a tloge a iketla. Jona a thabela mokhure woo ka kudu. ₇Fela ka mahube a letšatši le le latelago Morena a laela seboko sa fehla mokhure wola, mme wa hwa. ₈Ya re ge letšatši le hlaba, Modimo a tsoša phefo ye e fišago ya bohlabela, mme letšatši la fiša Jona hlogo a ba a nyaka le go idibala. Ka fao a duma ge nkabe a hwile. A bolela a re: “Go kaone ge ke hwile go na le gore ke fele ke phela.”

₉Eupša Modimo a mmotšiša a re: “A o bona go lebane gore o galefe ka lebaka la mokhure wo?”

Jona a mo fetola a re: “Ee, ke bona e le tshwanelo gore ke galefe – ke galefe la go hwa.”

₁₀Morena a re go yena: “Mokhure wo wa go gola bošego bo tee mme wa timelela bošego bjo bo latelago wena o o kwela bohloko, etšwe o se wa o šomela goba wa o mediša. ₁₁A bjale na motse wo wo mogolo wa Ninibe, nka napa ka se o kwele bohloko le go feta? Etse e bile motse wo o nago le bana ba ba se nago molato ba go feta ba dikete tše lekgolo le tše masome a mabedi, le diruiwa tše ntši.”