Go sepela le Modimo – Letšatši la 19

Thapelo ya moloki e na le maatla a magolo. Jakobose 5:16

Daniele e be le lesogana le lebotse, le bohlale go tšwa Juda, gammogo le bahlomphegi ba bagwe, ba be ba thopetšwe Babilonia go hlankela Kgoši Nebukadnesare gomme ya ba yo mongwe wa baeletši ba gagwe. Daniele o be a khunamela Modimo gomme a botega ka mehla go yena, a rapela gararo letšatši le letšatši le go latela ditekanyetšo tša gagwe maemong ka moka, go sa šetšwe ditlamorago. Go bile boima go Daniele le bagwera ba gagwe ba Bajuda go phela setšong se se fapanego seo se bego se sa latele melao ya Modimo, eupša go tloga mathomong, Daniele o bontšhitše maatla le semelo gomme a tšea kgato ka tsela ya go dira. Se se lekile yena go fihla boemong bja lehu, eupša se butše mahlo a kgoši go maatla a Modimo.

Daniele o kwešišitše gore go hlompha Modimo go be go hlaloša go rapela yena le go latela melao ya gagwe, gomme a “ikemišetša gore a ka se itšhilafatše ka go ja dijo tše di bego di lewa ke kgoši, le go nwa beine ye a bego a e nwa” (Daniele 1:8). O kgahlile Modimo gomme poelo e bile gore yena le bagwera ba gagwe ba be “ba bonala ba kgahliša mme ba phedile gabotse go phala bohle bale ba bego ba eja dijo tše di bego di lewa ke kgoši” (Daniele 1:15), eupša “Modimo a fa masogana ao a mane tsebo le kwešišo ya tša mangwalo le bohlale. Daniele yena o be a kgona le go hlatholla pono le toro efe le efe” (Daniele 1:17). Se se ba beile maemong a mabotse nageng e šele ka ge, ka mo go sa makatšego, kgoši “o ile a bona gore ba phala didupe le dingaka galesome mmušong wa gagwe ka moka” (Daniele 1:20).

Kgoši Nebukadnesare e be e le yo mogolo wa dikgoši tša Babilonia, eupša le ge a be a ipona e le modingwana, o be a sa tsebe tšohle gomme a hloka baeletši ba gagwe. O naganne gore go lokile gore dihlalefi ka moka ba bolawe (go akaretšwa Daniele) ge ba be ba pelela ke go mpotša toro ye a e lorilego gomme, ka gona, ba palela ke go mo hlathollela yona. Ka nnete o be a se a kwa ka Molawana wa Motheo! Ge Daniele a hwetša lebaka la gore o be a beditšwe go tlo bolawa gammogo le balepi ba dinaledi, boramaselamose le baloi bao e bego e le dihlalefi tša Nabukadnesare, kgato ya gagwe ya pele e bile go kopana le bagwera ba gagwe go rapela le go phophothela mogau wa Modimo. Modimo o arabile dithapelo tša bona ka go utolla toro ya kgoši go Daniele ka pono.

Ge Daniele a eya go kgoši go e hlatholla, ga se a itheta eupša o dumetše gore “dihlalefi le dingaka le didupe le boradinaledi ba ka se kgone go botša kgoši taba yeo. Fela go na le Modimo legodimong yo a utollago diphiri” (Daniele 2:27-28). Ge Daniele a feditše go hlatholla toro, Nebukadnesare o kgahlegile kudu “a itahlela fase ka sefahlego a obamela Daniele” gomme “Kgoši a re: ‘Ruri, Modimo wa gago ke Modimo wa medimo, ke Morena wa magoši, ke Moutolodi wa diphiri, ka gobane wena o kgonne go utolla sephiri se.’ ’’ (Daniele 2:47).

Go hlompha Modimo go tlišeditše Daniele tlhatlošo go buša profense ka moka le banna ba bohlale ka tlase go yena, gomme seo gape se tlišitše khuetšo ya Modimo mmušong. Potego ya gagwe ka thapelo e mo kgontšhitše go phela le go atlega bothopša, gomme a se šikinyege tumelong ya gagwe.