Go sepela le Modimo – Letšatši la 16

Gape Modimo o rile: “Nka se tsoge ke le tlogetše, ebile nka se tsoge ke le lahlile.” Baheberu 13:5

Puku ya Rute e humme le go tutuetša pelo gomme, go swana le puku ya Estere, e swanelwa ke go balwa ka moka. Ga e tutuetše fela, ke kanegelo ya lerato ye e felago ka lethabo magareng ga Rute le Boase, eupša gape ke kanegelo ya tswalano ye botse magareng ga mohlologadi yo monnyane le mmatswale wa gagwe. Rute le Naume ba na le tlamo e tiilego, ya go hloka boithati ge ba kgomarelana katanong ya bona ya go iphediša; eupša se segolo kudu ke potego ya Modimo maphelong a bahlologadi, ye e bontšhwago ka tlhahlo ya gagwe ye e makatšago go ba iša bophelong bjo boswa, lerato le tsošološo.

Naume o be a na le lerato le kgethigilego le tlhokomelo go Rute le Orpa, ngwetši ye nngwe ya gagwe, yo a abelanego bophelo bja gagwe le hlatse e botegago go nnete ya Modimo wa lerato le bohlale wa Israele. O a tseba gore yena ga go na se a ka ba neago sona, eupša o tshepha Modimo go ba hlokomela. O a ba šegofatša, mola a le gare a ba eletša ka bohlale: “Ipoeleleng magae le yo itulela malapeng a bolena. Hle, Morena a le dire ka botho bjalo ka ge le lena le dirile bao ba hwilego ka botho, mme le nna la ntira ka botho. Le gona, hle, a Morena a thuše yo mongwe le yo mongwe wa lena le nyalwe gape, le age metse.” (Rute 1:8-9)

Naume o be a tshwenyegile ka go phela gabotse le lethabo la Rute le Orpa, eupša bona ba be ba tshwenyegile ka yena gomme bobedi ba lla, ba sa nyake go mo tlogela. Le ge Orpa a boela ga gabo ka go se rate, Rute o kgetha go dula, a hlagiša mantšu a kgomago pelo a lerato le boikgafo go Naume ao a tiilego, ao a swanago le keno ya banyalani ge ba nyala. “Hle, se phegelele go nkgopela go go gomela. Ntumelele ke sepele nago. Mo o yago gona le nna ke tla ya; mo o dulago ntshe le nna ke tla dula gona. Batho ba geno e tla ba batho ba gešo, mme Modimo wa gago e tla ba Modimo wa ka. Mo o tlago hwela gona le nna ke tla hwela ntshe, mme ke gona moo ke tlago bolokwa ntshe. Go na le gore ke kgaogane le wena e se ka lehu, Morena a ka upša a nkotla ka kotlo e šorošoro.” (Rute 1:16-17)

Rute o tšere sephetho sa gore Naume le tšohle tše a dumelago go tšona, di be di le bohlokwa kudu go yena le go mo kgetha godimo ga dilo tšohle. O be a rata le go hlompha Naume kudu moo ka go ithaopa a tlogetšego lapa la gabo, naga le medingwana. Mantšu a Rute go Naume a na le potego go yena ye e sa fetogego le go se fele, bjalo ka potego ya Modimo go batho ba gagwe. Gomme Modimo a mo putsa.

Potego ke ye nngwe ya dipharologantšho tše bohlokwa tša Modimo le go ba bohlokwa kudu tswalanong ya gagwe le rena. E re dira gore re tsebe gore o tla re rata go ya go ile le gore a ka se fetoše monagano wa gagwe. Re ka mo tshepha ka gobane ga a fetoge (Numeri 23:19; Baheberu 13:8) gomme o tla šoma maphelong a rena bjalo ka ge a dirile bophelong bja Rute. Ge a re netefaletša gore a ka se tsoge a re tlogetše, ebile a ka se tsoge a re lahlile, ga re belaele.