Ditswalano – Letšatši la 10

Go Lukase 19 re bala ka Mojuda wa go huma, Sakiose, yo a bego a šomela Baroma bjalo ka molekgetho yo mogolo. O nametše llere la katlego go ya godimo ka boradia le tumelelano ya gagwe ya ka sephiring le Baroma. Se se mo dirile go ba molahlwa yo a hloilwego ke batho ba Bajuda – monna wa modiradibe yo batho ba go loka ba bego ba sa gwerane le yena – goba go ka dula le yena! (Lukase 19:5-7).

Lega go le bjalo Jesu, bjalo ka ge a dirile pele makga a mantši le “balahlwa”, ka boomo o kgetha go gwerana le bona: “Ge Jesu a fihla moo, ge a lelala a mmona gomme a re go yena: ‘Sakiose, fologa ka pela, gobane lehono ke swanetše go yo hlwa ka ga gago’ ” (Lukase 19:5). Kopano ye le Jesu le go Mo lemoga bjalo ka motho, e tlišitše phetogo ye e feletšego go Sakiose le ba lapa la gagwe – lehodu la ba monei yo a thabilego, ka mohlolo a ba le letswalo gomme a phološwa: “Lehono lapa le le phološitšwe …” (Lukase 19:9).

Ka seemo sa sebjalebjale boSakiose ba lehono ba ipea ka tsela ya leano gore ba bonwe le go kwewa. Ba sefahlegong sa gago; ga ba na šedi ge ba bolela se se lego kgopolong ya bona, eupša gantši ba kgetha ditiragalo tše kgomago maikutlo; ditsela tša bona tše sa amogelegego tša go dira dilo ka dinako tše dingwe ke dinnete; dipotšišo tša bona tše di dirago motho gore a se iketle di hlohla ditumelo tša gago le go “namela mohlare” gore o kgona go lebelela godimo o bone go feta matlakala mohlareng. Ka ntle le tetelo ya go botšwa gore ba fologe, gantši ba ba ba sa letela ge ba mengwa go tlo nwa kofi, moo ba nyakago le go wa mohlareng.

Bjalo ka Jesu, re swanetše go lebelela go feta gore ke mang goba bao “balahlwa” e lego bona le go thoma go ba bona bjalo ka batho bao ba hlokago lerato, eupša le bona ba ka kgona go rata. Ga go yo a ka sa fihlelelego ke lerato la Kriste, gomme re ka kgona go kgoma fela maphelo a batho ba bangwe ka lerato la Gagwe ge re ka latela tsela ya “ba bangwe” – re ratane, re abelane, re kgothaletšane, re rutane … Ge re ka dira se, kgato ya sebete ya go tsena mafelong le maphelong a bona a “ntle”, e ba kgato ya pele ya nyenyane go tšwa lefelong la gago la boiketlo, boithati le go itira moloki, gomme go bona ke kgato ya pele ya go sepela go tsela ya kholofelo le “ponagalo” ya batho.

O ka se dira bjang se? Ka go ya go motho o tee ka nako – ka thušo: “… gobane ka ntle le nna le ka se kgone selo” (Johanese 15:5).