Ditswalano – Letšatši la 9

Ka ntle le ge motho a go swaretše seipone a eme pele ga gago, ga o kgone go bona ge pelo ya gago e go fora. Motho o bjalo o tshwenyegile ka dikgahlego tša gago gomme o a go tshepha, eupša ge go hlokega, o bea seipone gore o kgone go ipona ka gare go sona. O a botega, eupša potego ya gagwe go Modimo le go mantšu a Gagwe, e tla pele. Motho yoo e ba morulaganyi wa gago – o ripa fa, a fetola mola gomme ka dinako tše dingwe o dira gore o bušeletše go dira dilo ka gobane setšweletšwa sa mafelelo e swanetše e be kanegelo ya Modimo ya bophelo bja gago.

Moprofeta Nathane e be e le morulaganyi wa Kgoši Dafida. Le ge mantšu a gagwe mathomong e be e le “Dira se o se gopotšego, ka gobane Modimo o na le wena”, ga se a ke a dikadike go gomiša mantšu a gagwe ge Modimo a re “Aowa!” (1 Dikronika 17:2-4). Eupša ka morago gape o a homotša le go kgothaletša ka go fihliša kholofetšo ya Modimo go Dafida le dithulaganyo go morwa wa gagwe: “Ke yena yo a tlago nkagela tempele … Ke tla mo fa maemo a go ya go ile setšhabeng sa ka le mmušong wa ka. Bogoši bja lešika la gagwe bo ka se tsoge bo fedile” (1 Dikronika 17:12-14).

Lentšu la Nathane ka ditsebeng tša Dafida la dira gore Dafida a ye a dule pele ga Morena a mmotšitša ka boikokobetšo a re: “Ga ke a swanela tše o šetšego o ntiretše tšona, Morena Modimo, gomme le lona lapa la ka ga le a di swanela?” (1 Dikronika 17:16).

Dafida o uta bootswa bja gagwe le Baatseba le polao ya monna wa gagwe, eupša ke Nathane yo a kwago ka yona go tšwa go Modimo gomme a ba letswalo la Dafida. O kgala Dafida ka se gomme Dafida o amogela sebe sa gagwe se lešago dihlong: “Ke dirile sebe pele ga Morena” (2 Samuele 12:13). Gomme poelo? Modimo o a mo lebalela gomme tswalano ya bona e a tsošološwa.

Nathane o thibela Dafida go roba ka go se tsebe kholofetšo ya gagwe go Batseba ya gore Solomone e tla ba kgoši. O utolla leano la Adonia, mohlatlami wa bobedi go setulo sa bogoši, la go ipea kgoši (1 Dikgoši 1:11-40), ka go realo a boloka botumo bja Dafida.

Kgafetšakgafetša, ka moka re hloka motho yo a kago emiša ganyenyane seširo sa bophelo bja rena, gore dibe tše di utamego dipelong tša rena di bonagale go rena.

Ke mang motho yo a kago go botša serokaphatla gore ga o bolele go tšwa molomong wa Jesu? Ke mang a kago go botša ntle le letšhogo gore ga o bolele nnete goba o swere motho yo mongwe gampe? Motho yo ke Nathane wa gago.

Motho yo o kwa go tšwa go Modimo gomme o kganyogela wena le ba lapa la gago dilo tše di botse. Ke motho yo o nago le tswalano le yena, yo a “rulaganyago” bophelo bja gago ka gobane o nyaka go bona morero wa Modimo wa bophelo bja gago o phethagatšwa.

Ekaba o na le Nathane? Goba o a itshepha bjalo ka morulaganyi wa bophelo bja gago? Hlokomela!