Dira phapano – Letšatši la 22

Etlang go Morena, yena leswika le le phelago le le nyaditšwego ke batho, eupša la kgethwa ke Modimo a re ke le bohlokwa. Dumelang go agiwa bjalo ka maswika a a phelago, le be tempele ya semoya, le be baprista ba bakgethwa, ba go dira dihlabelo tša semoya tše Jesu Kriste a dirago gore di amogelwe ke Modimo. 1 Petrose 2:4-5

Nagana ka leswika le lebotse kudukudu leo e sa lego wa le bona. Le a kgahliša ka tsela efe goba efe: ke leswika le le phelago. Ke leswika le bohlokwa ntlong ye e agilwego ka maswika, leo le oketšago bobotse bja yona ge o e lebelela gomme le na le boleng bjo bohlokwahlokwa bja go swara maswika a mangwe moagong woo mmogo. Ga se seo fela, eupša leswika le lengwe le le lengwe le a phela le lona gomme ge o lebelela, le lengwe le le lengwe le a fetošwa ka bobotse bjo bo tšwago go le lebotse – leswika la sekhutlo – go ba le lebotse, leo le tlago swana le lona ka bobotse.

Ga o hwetše maikwelo a poifo le lethabo ge o lemoga go re se se mabapi le Jesu le rena?

Petrose o bontšha, ka papišo ya gagwe, pontšho e botse ya temogo ya bokgoni bja moya ka gare go rena ge re e tla go Jesu, Leswika le le phelago. Ga re be fela bjalo ka yena, eupša re ba karolo e bohlokwa ya mošomo wa gagwe, ka ge a re aga go ba batho bao ba ineelago go yena le go ba sehlabelo se se phelago, se sekgethwa se se mo kgahlago (Baroma 12:1).

Ye ke kgopolo ya go kgahliša: re hloka go hwa gore re phele. Le ge re le diphedi, re hwile dibeng tša rena go fihlela ge re etla go Jesu gomme o dira gore re phele. Le ge go le bjalo, re swanetše go hwa go rena gore re kgone go phela go mo hlankela; eupša ge re e hwa mo lefaseng, re tla tšwela pele go phela legodimong le yena, ka go sa felego. Ge re hwile, re ka se dire phapano lefaseng. Go hlankela Modimo ke monyetla go bao ba phelago, e se go bao ba hwilego ba phela.

Jesu o biditše Bafarisei “mabitla ao a tloditšwego ka motaga”, ao “ka ntle a bonalago e le a mabotse, mola ka gare a tletše mašapo a bahu le go bola … le bonala le le ba ba lokilego, mola ka dipelong tša lena le tletše boikaketši le bokgopo” (Mateu 23:27-28). O ba kgadile ka gore: “Le ba madimabe, lena boramangwalo le lena Bafarisei, baikaketši tenang …” Go kotsi go tseba molao wa Modimo, eupša o palele ke go ba le moya wa wona gomme o se dire phapano.

Re bona phapano go mohlanka yo a botegago go seswantšho sa Jesu, yo mong wa gagwe, yo a bowago leetong, a ikarabetšego go boikgafo bja gagwe bja go dira phapano ge a se gona, ka mantšu: “O dirile gabotse, mohlanka yo a lokilego yo a botegago! O ile wa hlokomela tše dinnyane ka potego. Ka gona ke tla go bea mohlokomedi wa tše dintši. Tsena ka gae o tle o ipshine le nna!” (Mateu 25:21)

O tla holofela go kwa eng go tšwa go Modimo letšatši le lengwe?