BAROMA 12

₁Bjale ge, banabešo, ka ge Modimo a re gaugetše gakaaka, ke a le kgopela ke re: Ineeleng go yena le be sehlabelo se se phelago, se sekgethwa se se mo kgahlago. Ke wona mokgwa wa nnete wo le swanetšego go mo khunamela ka wona. ₂Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong. Ke mo le tlago tseba se e lego thato ya gagwe se se lokilego, se se mo kgahlago, se se feletšego.

₃Gomme ge ke bona mpho ye Modimo a mphilego yona ka kgaugelo ya gagwe, ke botša yo mongwe le yo mongwe wa lena gore a se ikgopole go feta tekanyo, eupša a ikgopole ka mo go mo swanetšego, a ipone go ya ka tumelo ye a e filwego ke Modimo. ₄Gobane re swana le mmele wo o nago le ditho tše dintši, mme ditho tšeo di sa dire modiro o tee tšohle. ₅Ka wona mokgwa woo, le rena le ge re le ba bantši, re mmele o tee ka Kriste, gomme mongwe le mongwe ke setho sa mongwekayena. ₆Re na le dimpho tše di fapafapanego tše Modimo a re babaletšego ka tšona go ya ka kgaugelo ya gagwe. Ge motho a filwe mpho ya go bega molaetša wa Modimo, a o bege go ya ka tumelo ye a nago le yona; ₇ge e le bodiredi, a direle ba bangwe; ge e le go ruta, a rute; ₈ge e le go kgothatša, a kgothatše; yo a abelago ba bangwe, a ba abele ka pelo ye tšhweu; yo a etago ba bangwe pele, a ba ete ka mafolofolo; yo a kwelago ba bangwe bohloko, a ba kwele a thabile.

₉Le se be le lerato la bofora. Le hloye bobe le itshwarelele ka boloki. ₁₀Le rataneng kudu ka mo go lebanego badumedi, mme le fišegele go hlomphana. ₁₁Le se itšimeletše go bontšha mafolofolo. Le be le matšato. Le direle Morena. ₁₂Le thakgatšwe ke kholofelo ye le nago le yona; ge le na le matshwenyego le se a felele pelo; le dule le rapela. ₁₃Tše le nago le tšona le di abelane le badumedi ba ba di hlokago; le thakgalele go amogela baeti.

₁₄Ba ba le hlomarago le ba šegofatše; ee, le ba šegofatše, le se ba roge. ₁₅Le thabe le ba ba thabilego, le lle le ba ba llago. ₁₆Le phedišane ka kwano. Le se llele bogolo, le upše le gwerane le babotlana. Le se ipone le le bahlalefi.

₁₇Le se itefeletše go bao ba le dirago bobe. Le leke go dira tše batho bohle ba bonago e le tše di lokilego. ₁₈Le dire ka mo le ka kgonago ka gona go phedišana le batho ka moka. ₁₉Barategi, le se ke la itefeletša, le upše le lefeletšwe ke Modimo a galefile, gobane Mangwalo a Makgethwa a re: “Ke nna ke lefeletšago; ke nna ke tlago bušetša. O realo, Morena”. ₂₀Go ya ka Mangwalo a Makgethwa: “Wena, ge lenaba la gago le swerwe ke tlala, o le fe dijo; ge le kgalegile, o le noše. Ka mokgwa woo o tla be o le leša dihlong e le ruri.” ₂₁O se ke wa fenywa ke bobe, o fenye bobe ka go loka.