MATEU 25

₁“Mehleng yeo mmušo wa Modimo o tla swantšhwa ka dikgarebe tše lesome tše di kilego tša tšea mabone a tšona, tša yo gahlanetša monyadi. ₂Tše tlhano tša tšona e be e le ditlaela, tše tlhano e le tše bohlale. ₃Tša ditlaela tša tšea mabone a tšona, eupša tša se ke tša duta makhura, ₄mola tšela tše bohlale tšona di tšea mabone di duta le makhura ka dibjana. ₅Monyadi a diega, ka gona dikgarebe tšela tša potuma, tša robala.

₆“Bošegogare gwa kwala mokgoši motho a re: ‘Monyadi šoowe! Etšwang le mo gahlanetše!’ ₇Dikgarebe tšela tše lesome tša tsoga, tša lokiša mabone a tšona. ₈Tšela tša ditlaela tša re go tše bohlale: ‘Nke le re topeletše makhura ka gobane mabone a rena a a tima.’ ₉Tšela tše bohlale tša ba fetola tša re: ‘Aowa, ga re na makhura a a ka lekanego rena le lena. Go kaone ge le ka yo ithekela go barekiši.’ ₁₀Ya re ba sa ile go reka, monyadi a šala a fihla. Bale ba bahlano ba ba bego ba itokišitše ba tsena le yena ka monyanyeng, gomme lemati la tswalelwa.

₁₁“Ka morago gwa fihla bale ba bangwe ba re: ‘Morena, morena, re bulele!’ ₁₂Monyadi yena a ba araba ka go re: ‘Aowa, ga ke le tsebe.’ ”

₁₃Gomme Jesu a feleletša ka go re: “Ka gona le dule le itokišitše, ka gobane ga le tsebe letšatši le nako ya go tla ga Morwamotho.”

₁₄“Mehleng yeo mmušo wa Modimo o tla swantšhwa ka monna yo a bego a nyaka go tšea leeto. A bitša bahlanka ba gagwe gomme a ba bea bahlokomedi ba thoto ya gagwe. ₁₅Mongwe a mo fa dipapetlana tše tlhano tša gauta, mongwe a mo fa tše pedi, mongwe a mo fa e tee. A fa yo mongwe le yo mongwe wa bona ka moo yena a mo tsebago a kgona ka gona. Ke moka a tšea leeto. ₁₆Mohlanka yola wa go fiwa dipapetlana tše tlhano a tloga le semeetseng a yo gweba ka tšhelete yeo, gomme ya mo tswalela dipapetlana tše dingwe tše tlhano. ₁₇Le yola wa go neelwa dipapetlana tše pedi a tswalelwa tše dingwe tše pedi. ₁₈Yola wa go neelwa papetlana e tee yena a yo epa molete, a fihla tšhelete yela ya mong wa gagwe.

₁₉“Ge go fetile nako ye telele mong wa bahlanka bale a boa gomme a ba botšiša gore ba dirileng ka tšhelete yela ya gagwe. ₂₀Mohlanka yola a bego a neetšwe dipapetlana tše tlhano tša gauta a batamela a mo neela tšela tše dingwe tše tlhano, a re: ‘Morena, o be o nneetše dipapetlana tše tlhano; bjale bona, tše dingwe tše tlhano tše ke di tswadišitšego tšona šedi.’ ₂₁Mong wa gagwe a re: ‘O dirile gabotse, mohlanka yo a lokilego yo a botegago! O ile wa hlokomela tše dinnyane ka potego. Ka gona ke tla go bea mohlokomedi wa tše dintši. Tsena ka gae o tle o ipshine le nna!’

₂₂“Ke moka gwa batamela mohlanka yola wa go neelwa dipapetlana tše pedi tša gauta, mme a re: ‘Morena, o be o nneetše dipapetlana tše pedi; bjale bona, tše dingwe tše pedi tše ke di tswadišitšego tšona šedi.’ ₂₃Mong wa gagwe a re: ‘O dirile gabotse, mohlanka yo a lokilego yo a botegago! O ile wa hlokomela tše dinnyane ka potego, ka gona ke tla go bea mohlokomedi wa tše dintši. Tsena ka gae o tle o ipshine le nna!’

₂₄“Ka morago gwa batamela mohlanka yola a bego a neetšwe papetlana e tee ya gauta, mme a re: ‘Ke tsebile gore o motho wa serumolani, o buna mo o sego wa bjala gona, o kgobela mabele a o sego wa ka wa a gaša. ₂₅Ka ge ke be ke boifa, ke ile ka tloga ka yo epela tšhelete ya gago. Bjale še yona.’

₂₆“Mong wa gagwe a re: ‘Mohlanka yo mobe wa sebodu towe! Kganthe o tsebile gore ke buna mo ke sego ka bjala gona, ke kgobela mabele a ke sego ka ka ka a gaša? ₂₇Gona nkabe o ile wa iša tšhelete ya ka polokelong, gomme ge ke boa nkabe ke hweditše tšhelete ya ka le tswala ya yona. ₂₈Bjale ge, mo amogeng papetlana yeo le e fe yola a nago le dipapetlana tše lesome. ₂₉Gobane mang le mang yo a nago le sa gagwe o tla okeletšwa, gomme a ba le tše dintši le go feta; eupša yo a se nago sa gagwe le bonnyane bjo a nago le bjona o tla bo amogwa. ₃₀Lefeelana le la mohlanka lona le lahleleng ka kua ntlentle leswiswing, moo a tlago lla a lomanya meno.’

₃₁“Mohla Morwamotho a etla e le Kgoši a na le barongwa ka moka, o tla dula setulong sa gagwe sa bogoši, ₃₂gomme ditšhaba ka moka di tla kgoboketšwa pele ga gagwe. Yena o tla ba kgethologanya bjalo ka modiši ge a kgethologanya dinku le dipudi. ₃₃Dinku o tla di bea ka letsogong la go ja, dipudi tšona a di bea ka go la nngele. ₃₄Ke moka o tla re go batho ba ba lego ka letsogong la go ja: ‘Etlang, lena le šegofaditšwego ke Tate! Etlang ke le iše legodimong le le le lokišeditšwego go tloga mola lefase le hlolwa. ₃₅Gobane ke ile ka re ke swerwe ke tlala, la mpha dijo; ka re ke nyorilwe, la mpha sa go nwa; ka re ke le mošele, la nkamogela ka malapeng a lena; ₃₆ka re ke hloka diaparo, la mpha tšona; ka re ke babja, la tla la mpona; ke le kgolegong, la nketela.’

₃₇“Baloki ba tla mmotšiša ba re: ‘Morena, ke neng mo re ilego ra go bona o swerwe ke tlala mme ra go fa dijo, goba o nyorilwe, ra go fa sa go nwa? ₃₈Ke neng mo re ilego ra go bona o le mošele, gomme ra go amogela ka malapeng a rena, goba o hloka diaparo, ra go fa tšona? ₃₉Ke neng mo re ilego ra go bona o babja goba o le kgolegong, mme ra go etela?’ ₄₀Kgoši o tla ba fetola a re: ‘Ruri, ke le botša gore ge le be le direla yo mongwe wa banabešo ba ba nyatšegago ba, le be le direla nna!’

₄₁“Ka morago o tla re go bao ba lego ka letsogong la gagwe la nngele: ‘Tlogang mo go nna, barogakwa tenang, le ye mollong wo o sa timego wo o goleditšwego Diabolose le barongwa ba gagwe! ₄₂Gobane ke ile ka re ke swerwe ke tlala, la se mphe dijo; ke nyorilwe, la se mphe sa go nwa; ₄₃ka re ke le mošele, la se nkamogele ka malapeng a lena; ka re ke hloka diaparo, la se mphe tšona; ka re ke babja, ke le kgolegong, la se nketele.’

₄₄“Bona ba tla mo fetola ba re: ‘Morena, ke neng mo re ilego ra go bona o swerwe ke tlala, goba o nyorilwe, goba o le mošele, goba o hloka diaparo, goba o babja, goba o le kgolegong, gomme ra se go thuše?’ ₄₅Yena o tla ba fetola a re: ‘Ruri, ke le botša gore ge le be le sa direle yo mongwe wa banyatšegi ba, ke gona ge le be le sa direle nna.’ ₄₆Gomme bona ba tla ya go otlwa ka go sa felego, baloki bona ba tla ya go phelela sa ruri.”