Dira phapano – Letšatši la 16

… ke lentšu le le phelago la go ya go ile la Modimo la ba bana ba motswadi yo a sa hwego, e sego yo a hwago. 1 Petrose 1:23

Khawaliti le kgotlelo ke dika tše bohlokwa tša dilo ka moka bophelong. Ge o nyaka go reka koloi, o tla nyaka ye otlelegago gabotse ye e tlago kgona go go boloka. Gape e swanetše go botega le go tshephega gore e swarelele. Ga o selikišege ge founu ye mpsha e sa go dumelele go thaepa, dikgwedi tše mmalwa morago ga go e reka; goba ge leoto la setulo le wela fase goba mpho ya Krisemose ye ngwana wa gago a e letilego nako e telele e swarelela fela matšatši a mmalwa?

Re phela lefaseng moo dilo di sa swarelelego, go sa šetšwe gore o di lefetše ka bokae, gaešita le dilo tše kgethegilego tšeo di swanetšego go swarelela. Le ge go le bjalo, ka mehla re holofela go hwetša selo se sekaone seo se tlago swarelela.

Le ge go le bjalo, ga se fela dilo tša materiale tšeo di robegago le go re bakela matahata. Ge maitswaro le ditekanyetšo setšhabeng di fela, di baka go se tsepame le pelaelo; dikholofetšo, dikeno le tshepo di a robega di baka manyami le go se tshephege; ditswalano di a phuhlama gomme malapa a thubega, gwa dira gore batho ba ipotšitše ka potego ka gare go bona.

Tšohle tše di nago le medi lefaseng le di thubega gabonolo, eupša selo sefe goba sefe se se nago le medi ya sona go Modimo ga se hwe. Re hloka go hlalefa go bona seswantšho ka moka gomme re se bone karolo ya sona seo se bopago bophelo bja rena bja letšatši le letšatši. Re hloka go tseba Mmopi wa rena, yo a sa fetogego, le Jesu Kriste yo a re phološago go rena, ka go lebalela dibe tša rena le go re iša legodimong.

Tšohle tše re di nyakago bophelong le go sa felego di hwetšwa ka Bibeleng – lentšu le le phelago, lentšu la go ya go ile, le bolelwa goba go ngwalwa.

Gatee, ba bangwe ba balatedi ba gagwe bao ba bego ba nolegile moko ba tlogile, Jesu a botšiša barutiwa ba gagwe ge e ba le bona ba nyaka go tloga. Petrose, yo a ngwetšego lengwalo le, a fetola, “Ra tloga ra ya go mang, Morena? Gape wena o bolela tša go fa motho bophelo bjo bo sa felego” (Johanese 6:68). Petrose o bile le bohlale bja go tseba moo kholofelo ya gagwe e bego e le gona. Batho ba bantši ba nagana gore ke bohlale go “nyaka” nnete go dikgetho tše ntši kudu tše lefase di le neago, eupša ke boitemogelo bja lentšu la Modimo, leo fela le tiilego le go tshephega, gomme le ka se palele goba go robega, leo le re thušago go hwetša tlhalošo ya bophelo bja rena lefaseng le ka morago ga lefase.

Jesu ka boyena o rile, “Ka gona, mang le mang yo a kwago mantšu a a ka gomme a phetha tše ke di bolelago, o swana le monna yo bohlale yo a agilego ngwako wa gagwe leswikeng. Gwa na pula ye kgolo, dinoka tša falala, le phefo ya tšutla ngwako woo kudu. Eupša wa se ke wa wa, ka gobane o agilwe leswikeng.” (Mateu 7:24-25)