Dira phapano – Letšatši la 15

Gobane le tswetšwe ka bofsa ke lentšu le le phelago la go ya go ile la Modimo la ba bana ba motswadi yo a sa hwego, e sego yo a hwago. Petrose 1:23

Go tswala leswa; matho a maswa. Peu ye e sa bolego; ye ke kgopolo ye e makatšago!

Ga se mang le mang yo a hwetšago go le bonolo go kwešiša kgopolo ye, ka ge re bona Nikodemose a botšiša Jesu gore motho a ka boela bjang popelong ya mmagwe (Johanese 3:4); eupša, ke batho ba bakae bao ba rilego ba ka rata go ba le monyetla wa go thoma ka leswa le go se dire diphošo tše di swanago?

Balatedi ba nnete ba Jesu ba tswetšwe leswa, e se nameng, eupša semoyeng, gomme maphelo a bona a fetogile, ba bangwe ka tsela e makatšago, ge ba thoma leswa. Bophelo bjo bja go kgahliša bjo boswa bo ba gona ka gobane Jesu o aba seo se bego se se gona – meetse a phelago a Moya wa gagwe. O re, “ … fela yo a nwago meetse a nna ke mo fago ona a ka se tsoge a nyorilwe gape.” (Johanese 4:14)

Go mabapi le meetse – e swanetše e be ao a phelago! Re tswalwa lefaseng le ka peu yeo e bolago ya batswadi ba rena nako e lekanyeditšwego, le ge go le bjalo, ke ka peu ye e sa bolego ya Morena Jesu Kriste moo re tswalago leswa go bophelo bjo bo sa felego.

Go tloga bjaneng, Modimo o a re lokiša go kwešiša kgopolo ye e bohlokwa, le tše dingwe tše ntši, ka dika go tlhago. Ke mang yo a sa makatšwago ke gore semela se sebotse se hloga go peu ye nnyane, ye e omilego, goba go kgahlwa ke serurubele se sebotse se se tswalago ka lebaka la modikologo wa bophelo ya khunkhwane? Ke mang yo a sa gateletšwago go bona tšohle ka ntle le meetse?

Modimo, le ge go le bjalo, o šoma le dinakong tša komelelo! Ke makaditšwe ke kgotlelelo ya serapa sa ka go komelelo ye re itemogetšego yona. Ke bjetše dimela tše ntši gomme ka lebelela ke makatše ge di thoma go hloga gomme bjang ya ba bjo bo phifadu, ka lebaka la tlhokego ya pula. Ke be ke šetše ke thomile go tloša bjo bongwe ge, ka mohlolo, dipula tše sego kae di fihla. Ka go makala, bjo bongwe bjo bo bego bo šetše bo le bjo phifadu gape bo omile gateetee bja thoma go ba le mahlogedi a matala le go boela sekeng, mola bjo bongwe bjo bo bego bo šetše e le bjo botala gape bo omile bo tšweleditše matšoba ao ke sa kago ka a bona pele! Naa Mmopi wa rena yo mmotse ga a re nee kholofelo ka mehla?

O re bontšha gore seo a se bonago le go se dira se boemong bjo bo fapanego kudu go rena. Re bona sehlašana se se hwilego; o bona kgonagalo ya bophelo yeo dipula di sego kae di ka bo tlišago. Re bona mmele wo o hwilego o bolokwa; o bona moya o fetošitšwe go ba selo se sebotse, go ya go ile!