JOHANESE 6

₁Ka morago ga moo Jesu a tshelela ka mošola wa letsha la Galilea, le ba bangwe ba rego ke la Tiberiase. ₂A latelwa ke lešaba le lentši la batho, ka gore ba be ba mmone a dira mehlolo ya go fodiša balwetši. ₃Jesu a namela thaba, a fihla a dula gona le barutiwa ba gagwe. ₄Ke ge monyanya wa Bajuda wa Paseka o šetše o le kgauswi. ₅Jesu ge a gadima ka gohle a bona gore lešaba le le tlago go yena ke le lentši, gomme a botšiša Filipi a re: “Dinkgwa tša go khoriša batho ba re tla di reka kae?” ₆Ge a realo o be a dio mo leka, gobane yena o be a šetše a tseba se a tlago se dira.

₇Filipi ge a mo fetola a re: “Dinkgwa tša dipapetlana tša silibera tše makgolo a mabedi di ka se ba lekane le ge e le gore yo mongwe le yo mongwe a ka dio fiwa nthathana.”

₈Yo mongwe wa barutiwa ba gagwe, e lego Andrease, ngwanaboSimone Petrose, a re: ₉“Go na le mošemane yo mongwe mo yo a nago le dinkgwa tše tlhano tša garase le dihlapi tše pedi. Fela tšeo di ka holang ge batho ba le kaaka?”

₁₀Jesu a re: “Dudišang batho fase.” Felo moo go be go na le bjang bjo bontši. Ka gona batho ba dula fase. Banna ba ba bego ba le moo e be e ka ba ba dikete tše tlhano. ₁₁Jesu a tšea dinkgwa tšeo, a leboga Modimo, a laela gore di abelwe ba ba dutšego moo. Le dihlapi a ba abela tšona ka mokgwa woo, gomme batho ba ja ka mo ba nyakago ka gona. ₁₂Ya re ge ba khoše a laela barutiwa ba gagwe a re: “Kgoboketšang marathana a a šetšego, gore go se lahlege selo.” ₁₃Ba a kgoboketša, gomme ba tlatša diroto tše lesome le metšo ye mebedi ka marathana ao a dinkgwa tšela tša garase, a go šadišwa ke ba ba llego.

₁₄Batho ge ba bona mohlolo woo wa go dirwa ke Jesu ba re: “Ka nnete yo ke yena Moprofeta yo go boletšwego gore o tla tla lefaseng!” ₁₅Jesu ge a bona gore ba tla tla ba mo goga gore ba yo mmea kgoši, a ba ngwegela, a namelela godingwana thabeng a nnoši.

₁₆Mantšiboa barutiwa ba Jesu ba theogela letsheng, ₁₇ba fihla ba namela leselawatle, ba boela ka mošola wa letsha, ba leba Kapernaume. Leswiswi la ba la swara Jesu a sešo a tla go bona. ₁₈Phefo ye kgolo le yona ke ge e foka e tšubotla lewatle. ₁₉E rile ge ba sepetše ka leselawatle sekgala se e ka bago dikilometara tše tlhano go iša go tše di selelago, ba bona Jesu a sepela godimo ga meetse, a batamela leselawatle leo la bona, gomme ba tšhoga. ₂₀Jesu a re go bona: “Le se ke la tšhoga – ke nna!” ₂₁Ba be ba rata go mo nametša leselawatle, gomme ka bjako ke ge leselawatle leo le fihlile lebopong felo mo ba bego ba eya gona.

₂₂Ka tšatši le le latelago lešaba le le bego le šetše ka mošono wa letsha, la lemoga gore ga se gwa ka gwa ba le leselawatle le lengwe moo ntle le lela barutiwa ba Jesu ba le nametšego, gomme ba be ba tseba gore Jesu yena ga se a namela nabo, bona ba tlogile ba nnoši. ₂₃Go ile gwa tla maselawatle a mangwe a go tšwa motseng wa Tiberiase, kgauswi le felo mola lešaba le bego le khorišitšwe dinkgwa gona ge Morena a seno leboga Modimo. ₂₄Lešaba ge le lemoga gore Jesu ga a gona, le bona barutiwa ba gagwe ga ba gona, la namela maselawatle ao la ya Kapernaume le mo nyaka.

₂₅Batho ba rile go hwetša Jesu ka mošola wa letsha, ba mmotšiša ba re: “Moruti, na mo o tlile neng?”

₂₆Jesu a ba fetola ka go re: “Ruri, ruri, ke le botša gore ga le nnyake ka gobane le bone mehlolo, eupša le nnyaka ka gobane le ile la ja dinkgwa la khora. ₂₇Le se ke la gaba dijo tše di felago, le upše le gabe tša go fa motho bophelo bjo ba sa felego. Gape ke tšona tše Morwamotho a tlago le fa tšona, ka gobane Modimo Tate o bontšhitše gore o a mo kgahla.”

₂₈Ke mo ba mmotšišitšego ba re: “Re direng ge re rata go phetha tše Modimo a di nyakago?”

₂₉Jesu a ba fetola ka go re: “Se Modimo a nyakago gore le se dire ke gore le dumele go nna yo a nthomilego.”

₃₀Bona ba re: “O tla dira mohlolo mang wo e tlago re ge re o bone ra go dumela? Ke eng se o tlago se dira? ₃₁Etse borakgolokhukhu ba rena bona ba be ba eja manna kua lešokeng, bjalo ka ge Mangwalo a Makgethwa a bolela a re: ‘O ba file senkgwa se se tšwago legodimong gore ba je.’ ”

₃₂Jesu a re go bona: “Ruri, ruri, ke le botša gore ga se Moshe yo a le filego senkgwa se se tšwago legodimong; senkgwa sa mmannete se se tšwago legodimong le se fiwa ke Tate. ₃₃Gobane senkgwa se le se fiwago ke Modimo ke yena Motheogalegodimong, yo a fago batho ba lefase bophelo bjo bo sa felego.”

₃₄Bona ba mo kgopela ba re: “Morena, re fe senkgwa seo ka mehla.”

₃₅Jesu a re: “Ke nna senkgwa seo sa go fa motho bophelo bjo bo sa felego. Yo a tlago go nna a ka se tsoge a swerwe ke tlala; yo a dumelago go nna a ka se tsoge a nyorilwe. ₃₆Fela ke le boditše ka re le ge le mpone ga le ntumele. ₃₇Mang le mang yo Tate a mphago yena o tla go nna, gomme yo a tlago go nna, nna nka se mo rake, ₃₈ka gobane ga se ka theoga kua legodimong go tlo phetha thato ya ka, ke tletše go phetha ya yo a nthomilego. ₃₉Gomme thato ya yo a nthomilego ke gore ke se lahle le o tee wa bao a mphilego bona, bohle ke ba tsoše bahung ka tšatši la mafelelo. ₄₀Se Tate a se nyakago ke gore mang le mang yo a bonago Morwagwe mme a dumela go yena, a be le bophelo bjo bo sa felego, gomme nna ke tla mo tsoša ka tšatši la mafelelo.”

₄₁Bajuda ba ngongorega ka yena, ka ge a rile: “Ke nna senkgwa se se theogilego legodimong.” ₄₂Ba nama ba re: “Na ga se yena Jesu, morwa wa Josefa, yo re tsebago tatagwe le mmagwe? Bjale o ra go reng ge a re o theogile legodimong?”

₄₃Jesu a re: “Tlogelang go dulela go ngongorega. ₄₄Gape ga go motho yo a ka tlago go nna a sa gogwe ke Tate yo a nthomilego, gomme ke nna ke tlago mo tsoša bahung ka tšatši la mafelelo. ₄₅Yo mongwe wa baprofeta o ngwadile go re: ‘Bohle ba tla be ba rutilwe ke Modimo.’ Ka gona, mang le mang yo a kwago Tate mme a ithuta go yena, o tla go nna. ₄₆Go realo ga se go re go na le yo a kilego a bona Tate; nna ke tšwago go Modimo, ke nna fela yo ke bonego Tate. ₄₇Ruri, ruri, ke le botša gore yo a dumelago o šetše a na le bophelo bjo bo sa felego. ₄₈Ke nna senkgwa sa go fa motho bophelo bjo bo sa felego. ₄₉Borakgolokhukhu ba lena ba be ba eja manna kua lešokeng, le ge go le bjalo ba ile ba hwa. ₅₀Senkgwa se se theogilego legodimong gore ge motho a se ja a se sa hwa sese: ₅₁Ke nna sona senkgwa seo sa go phediša, se se theogilego legodimong. Ge motho a eja senkgwa se o tla phela go ya go ile. Senkgwa se ke tlago mo fa sona ke nama ya ka ye ke e fago batho ba lefase, gore ba phelele sa ruri.”

₅₂Ge a realo Bajuda ba galefa gomme ba thoma go ngangišana ba re: “Na motho yo a ka napa a re fa nama ya gagwe ra e ja?”

₅₃Jesu a re go bona: “Ruri, ruri, ke le botša gore ge le sa je nama ya ka, nna Morwamotho, la nwa le madi a ka, gona le ka se phelele sa ruri. ₅₄Yo a jago nama ya ka le gona a nwago madi a ka, yena o šetše a na le bophelo bjo bo sa felego, gomme ka tšatši la mafelelo ke tla mo tsoša bahung. ₅₅Gape nna nama ya ka ke sejo sa mmannete, le madi a ka ke seno sa mmannete. ₅₆Yo a jago nama ya ka, a nwago le madi a ka, o dula ka go nna, le nna ke dula ka go yena. ₅₇Yo a ntšago o tla phedišwa ke nna, bjalo ka ge le nna ke phedišwa ke Tate, Mophedi yo a nthomilego. ₅₈Ke nna sona senkgwa se se theogilego legodimong. Ga se swane le sela borakgolokhukhu ba lena ba bego ba re le ge ba se ja ba no hwa. Yo a jago senkgwa se yena o tla phelela sa ruri.”

₅₉Ditaba tše Jesu o di boletše mola a ruta batho ka sinagogeng kua Kapernaume.

₆₀Barutiwa ba bantši ba gagwe ge ba ekwa a realo ba re: “Owe! Taba ye a e bolelago ye ke ye thata! Ke mang yo a ka e theeletšago?”

₆₁Jesu a tseba ka boyena gore taba ye e a ba ngongoregiša, gomme a ba botšiša a re: “Na taba ye ke e boletšego ye e a le kgopiša? ₆₂Ge le ka bona Morwamotho a rotogela kua a bego a le gona pele, gona le tla reng? ₆₃Gape Moya wa Modimo ke wona wo o phedišago; motho yena ga a kgone. Mantšu a ke le boditšego ona a a tšwa go yena Moya, gomme a a phediša. ₆₄Eupša ba bangwe ba lena ga ba dumele.” Gape go tloga mathomong Jesu o be a tseba gore ba ba sa tlego go dumela ke bomang, le gore yo a tlago mo eka yena ke mang. ₆₅A iša pele a re: “Ke ka lebaka leo ke le boditšego gore ga go yo a ka kgonago go tla go nna a sa kgontšhwe ke Tate.”

₆₆Ka lebaka la polelo yeo ya gagwe barutiwa ba gagwe ba bantši ba ile ba napa ba boa ka sa morago, ba se sa sepela naye. ₆₇Ke ge a botšiša barutiwa bale ba gagwe ba lesome le ba babedi a re: “Kgane le lena le nyaka go tloga?”

₆₈Gwa fetola Simone Petrose a re: “Ra tloga ra ya go mang, Morena? Gape wena o bolela tša go fa motho bophelo bjo bo sa felego. ₆₉Gomme rena re tloga re dumela ebile re tšea gore ke wena Mokgethwa wa Modimo.”

₇₀Jesu a fetola a re: “Ga ke re ke le kgethile le le ba lesome le ba babedi? Fela yo mongwe wa lena ke diabolose!” ₇₁Etse o be a era Judase, morwa wa Simone Iskariote, gobane ke yena yo a bego a tlilo mo eka, le ge e be e le yo mongwe wa ba lesome le ba babedi.