Dira phapano – Letšatši la 17

“Batho ka moka ba swana le bjang, letago lohle la bona eka matšoba a naga. Bjang bo a omelela, le matšoba a a hlohlorega, eupša lentšu la Morena le duletše ruri. Lentšu le ke yona Taba ye Botse ye le e begetšwego.” 1 Petrose 1:24-25

Naa mantšu ga se seswantšho sa nnete sa modikologo wa bophelo lefaseng, kgahlanong le bokamorago bja motheo wo o tiilego wa nnete wa go sa felego?

Mantšu a a Jesaya a bolela ka letlotlo le bohlokwahlokwa – lentšu la Modimo. Lona fela le na le boleng bjo bo swarelelago gomme yo mongwe le yo mongwe yo a swarelelago go lona o tla tseba bogona bja Morena bophelong bja gagwe, gammogo le maatla a bjona, khomotšo, tlhahlo, bohlale le tutuetšo.

Bjang bo tlwaelegile gomme bo mela mafelong a mantši. Gantši, bo hloka go nošetšwa le go laolwa gore bo gole, moo bo gašitšwego gona. E ka ba bjo bobotse: bjo bongwe ke bjo bo telele, bjo bongwe ke bjo bokopana, mola bjo bongwe e le bjo bosesane; mabjang ka moka a ka ba le ngwang, woo o a dirago gore a lebege a sa kgahliše.

Seo gape se ka hlaloša batho gape! Ga go na taba gore re bomang le gore re tšwa kae, ka moka re na le tlhamo ya motheo le dinyakwa tša motheo, eupša yo mongwe le yo mongwe o na le moya wa gagwe wo o hlodilego ke Modimo. Mmele, monagano le moya di hloka go lekalekantšhwa gore o atlege le go hwetša mohola bophelong, le ge go le bjalo, batho ba bantši ba hwetša go le boima. Go bile bjalo go Solomone. O be a le kgoši ya bohlale bjo bogolo, le ge go le bjalo a hwetša go le boima go ba bohlale gomme a lahlegelwa ke morero. O lekile tšohle maitekong a gagwe go hwetša tlhalošo ya bophelo. O dumetše gore, “Ka se itime selo go tšohle tše ke di dumago. Gwa se be le boipshino bjo ke itlhaetšago bjona, gobane go nna kalokano e be e le boipshino, gomme tšeo ka moka e be e le moputso wa kalokano ya ka. Eupša ya re ge ke nagantšhiša tšohle tše ke di dirilego, le ka mo ke katanetšego go di dira, ka lemoga gore tšohle ke lefeela. Di swana le go phuthela phefo ka kobo, ga di na mohola.” (Mmoledi 2:10-11)

Le ge a be a na le lehumo le legolo, dijo tša phepo le beine, mafelo le diphaka tše botse, le basadi ba 700 le metlabo ye 300, ga go selo se se mo kgotsofaditšego. Bophelo bo be bo se na selo go yena. O lemogilego gore Ie ge a be a na le maemo a maatla, lehu le be le mo letile go swana le batho ka moka le gore tšohle tše a bego a na le tšona di tla fiwa motho yo mongwe. O be a sa kwešiše bophelo! Mmoledi o re: “Tšohle ke lefeela, lefeela la mafeela.” (Mmoledi 12:8)

Ka morago, le ge go le bjalo, o rumile ka bohlale: “Taba ya mafelelo mo go tšohle tšeo še: Boifa Modimo, o phethe melao ya gagwe, ka gobane seo se ama batho ka moka. Modimo o tlilo sekišetša batho tšohle tše ba tla bego ba di dirile, tša go loka le tša go se loke, ešita le tše ba di dirago ka sephiring.” (Mmoledi 12:13-14)