Dira phapano – Letšatši la 12

Etse ge le rapela Modimo, yena yo a ahlolago batho ka go se kgetholle, a yago ka tše motho a di dirilego, le re Tatagorena. Ka gona, phelang ka go mmoifa nakong yohle ya ge le le bafaladi mo lefaseng. 1 Petrose 1:17

O gopola sehlopha sa gago sa mmamoratwa se lahlegelwa ke papadi e bohlokwa, ka gobane malokwane o be a bontšha kgethollo; goba mogwera wa gago a thopa sefoka sa taodišo, mola bobedi le be le na le dintlha tše swanago; goba molaodi wa gago a kgetha motho go mo nea ponase, mola o bontšhitše gore o na le bokgoni kudu? Dilo tše ka nnete di go tlogetše o befetšwe, o gatelegile gape o nyamile.

Kgethollo ga e a loka gomme e tlogela mabadi, bjalo ka ge e bonwa ka malapeng, kerekeng le ka nageng, ka kakaretšo. Modimo a ka se tsoge a dirile se gomme o kgahlanong le se. Ge ditlwaedi tše e sego tše kgethwa di tšwela pele, batho ba ikwa ba sa kgotsofale, ba sa iketla le go lahlegelwa ka tumelo. Re ikwa re sa kgone go ithuša go ba dihlatse go go hloka toka goba motšwasehlabelo wa kgethollo, gomme ka dinako tše dingwe re itšeela dilo matsogong, gantši re sa atlege. Re swanetše go gopola gape, le ge go le bjalo, gore dipono tša rena ke tša rena le go nagana gore go ka ba le mabaka a mangwe a maleba ao re sa a tsebego. Modimo o tla re thuša go tseba se, ge re kgopela thušo ya gagwe, le go re kgontšha go tliša tlhompho go yena.

Go se kgothello go ka se kgonthišetšwe lefaseng le, ka gobane ga go yo a phethagetšego gomme ga go yo a  ka bonago seswantšo se segolo, goba go bona ka kgopolong goba pelong ya motho yo mongwe! Le rena re forwa ke ponagalo ya ka ntle, le ge re nagana gore ga re kgetholle boemong. Modimo ke yena fela yo a nago le toka ka gobane ke “Moahlodi wa lefase ka moka yo a dirago toka ” (Genese 18:25). O na le toka gomme o tla ahlola batho ka moka ka nako ya maleba.

Lengwalong la gagwe, Jakobose o hlohla badumedi ka go ba botšiša gore: “… na e tla be e se gore le a kgethollana, le ahlola ka mokgwa wo mobe?” (Jakobose 2:4). A re naganeng ka fao re ka ipapetšago ka gona. Naa re swara motho yo a se nago legae kopanelong ya rena ka tsela ye re swarago yo a aperego gabotse? Go thweng ka mofaladi go tšwa nageng ye nngwe goba bao ba tšofalago? Gopola, Modimo o lebelela pelo.

Petrose o re laela go hlompha Morena kudukudu, yo a swarago yo mongwe le yo mongwe ka toka, le go phela ka tsela ye e mo hlomphago. Go se kgetholle ke ye nngwe ya dipharologantšho tša Modimo (Baroma 2:11), ka gona ke pharologantšho e bohlokwa go e bjala ka go phegelela bokgethwa le go dira phapano. O tla thuša bao ba dumelago le go obamela ditaelo ka Bibeleng ka moka.

O tla mo kgopela thušo?