Abrahama o holofetšwa morwa
1Morena o ile a iponagatša go Abrahama mehlareng ye mekgethwa ya Mamre. Abrahama o be a dutše mojakong wa mošaša wa gagwe nakong ya ge letšatši le fiša tšhiritšhiri. 2Ya re ge a iša mahlo a bona banna ba bararo ba eme moo. Ge a ba bona a kganyelela go ba gahlanetša. A obamela fase, 3a re: “Barena, hle, se mpheteng, nna, mohlanka wa lena. 4A ke yo le tšeela meetse le tle le hlape maoto; le ka khutša ka fase ga mohlare wo. 5Ke tla ba ka le tlela le dijonyana tša go le lapološa, le tsebo tšwela pele le leeto la lena, ka gobane le fetile mo lapeng la mohlanka wa lena.”
Ba mo fetola ba re: “Go lokile.”
6Abrahama a akgofela mošašeng a re go Sara: “Akgofa o tšee mokotlana wa bupi bja mathume, o bo dube, o apee dinkgwa.” 7Ke moo a kitimetšego mohlapeng mme a kgetha namane ya lerojana ya go nona, a e neela mohlanka, mme yoo a itlhaganela a e hlaba. 8Abrahama a tšea lebebe le maswi le nama a di bea pele ga banna bale ka moo fase ga mohlare, ba ja, yena a ba emaemela.
9Ke moo ba mmotšišitšego ba re: “Mosadi wa gago, Sara, o kae?”
A ba fetola a re: “O ka mola mošašeng.”
10Yo mongwe wa bona a re: “Ngwaga wo o tlago ka nako ye ke tla boa mo, gomme mosadi wa gago, Sara, o tla be a na le morwa.”
Sara o be a le ka morago ga gagwe, mojakong wa mošaša, a theeditše. 11Abrahama le Sara ba be ba tšofetše kudu, gomme Sara o be a sa hlwe a bona kgwedi. 12Ka gona Sara a itshegela a re: “Na nka re ke kgekotše ke le bjale ka hlwa ke sa kgona go ipshina ka go robala le monna? Monna wa ka le yena o tšofetše.”
13Ke moo Morena a botšišitšego Abrahama a re: “Sara o reng a sega ge a re: ‘Na nka re ke tšofetše ka mokgwa wo ka hlwa ke sa ba le ngwana?’ 14A go na le seo se ka šitago Morena? Bjalo ka ge ke boletše, ngwaga wo o tlago ka nako ye ke tla boa mo, mme Sara o tla be a na le morwa.”
15Ka ge Sara a be a boifa o ile a latola a re: “Ga se ka sega.”
Morena a re: “Ee, o segile, hle.”
Abrahama o phophothela Sodoma
16Ke moo banna bao ba tlogilego ba ya felo moo ba ka rego ge ba le gona ba okamela motse wa Sodoma, mme Abrahama a ba felegetša. 17Gomme Morena ka pelong a re: “Na nka napa ka utela Abrahama seo ke tlilego go se dira? 18Ditlogolo tša gagwe e tla ba setšhaba se segolo se maatla, gomme ditšhaba tša lefase ka moka di tla nkgopela go di šegofatša bjalo ka ge ke mo šegofaditše. 19Ke mo kgethile gore a laye barwa ba gagwe le ditlogolo tša gagwe gore ba ntheetše, mme ba dire tše di swanetšego le tše di lokilego. Ge ba ka dira bjalo, ke tla mo direla tšohle tše ke mo holofeditšego tšona.”
20Ke moo Morena a itšego go Abrahama: “Motse wa Sodoma le wa Gomora e begwa ka tše di šiišago, gomme sebe sa badudi ba gona ke se segolo kudu. 21Ke swanetše go theoga go yo bona ge eba tše ke kwelego ba begwa ka tšona ke nnete; gomme ge e se nnete ke tla tseba.”
22Ke moo banna ba babedi bao ba tlogilego ba leba Sodoma, Morena yena a šala le Abrahama. 23Abrahama a batamela Morena, a mmotšiša a re: “A ruri o yo fediša batho ba ba se nago molato mmogo le bao ba nago le molato? 24Ge go na le batho ba masome a fetšago seatla ba ba se nago molato motseng, a o ka fediša motse ka moka? A o ka se o swarele ka lebaka la bao ba masome a mahlano? 25Hle, taba ye bjalo o se e dire, wa bolaya baloki le bakgopo gotee, wa swara baloki le bakgopo go swana. Hle, yeo taba o se ke wa e dira! Ga ke re Moahlodi wa lefase ka moka o swanetše go dira ka toka?”
26Morena a mo fetola a re: “Ge nka hwetša baloki ba masome a mahlano kua Sodoma, ke tla swarela motse ka moka ka lebaka la bona.”
27Abrahama a buša a re: “Hle, o ntshwarele ge ke fela ke bolela le wena, Mong wa ka. Ke nna motho fela, ga ke na tokelo ya go bolela selo. 28Mohlomongwe go ka ba le baloki ba masome a mane le ba bahlano fela, e sego ba masome a mahlano. A o tla fediša motse ka moka ka gore go hlaelelwa ba bahlano?”
Morena a mo fetola a re: “Nka se fediše motse woo ge nka hwetša baloki ba masome a mane le ba bahlano.”
29Abrahama a tšwela pele a re: “Mohlomongwe e tla ba ba masome a mane fela.”
Morena a mo fetola a re: “Nka se o fediše ge go na le ba masome a mane.”
30Abrahama a re: “Hle, o se ke wa mpefelelwa, Mong wa ka, ge ke bolela gape. Mohlomongwe e tla ba ba masome a mararo fela.”
Morena a mo fetola a re: “Nka se o fediše ge nka hwetša ba masome a mararo.”
31Abrahama a re: “Hle, o ntshwarele ge ke sa fela ke bolela nago, Mong wa ka. Mohlomongwe go ka ba le ba masome a mabedi fela.”
Morena a re: “Nka se fediše motse woo ge nka hwetša ba masome a mabedi fela.”
32Abrahama a re: “Hle, o se ke wa mpefelelwa, Mong wa ka, mme ke tla bolela gatee fela. Mohlomongwe go ka hwetšwa ba lesome fela.”
Morena a re: “Nka se o fediše ge e le ba lesome.” 33Ya re ge Morena a feditše go bolela le Abrahama a sepela, mme Abrahama a boela gae.
