Dira phapano – Letšatši la 11
O dira Phapano ka Bokgethwa
(Di)temana ya Bibele
1 PETROSE 1
2 BAKORINTE 12
EKSODOSE 4
“Ebang ba bakgethwa, gobane nna ke yo mokgethwa.” 1 Petrose 1:16
Nagana o kgethilwe pele o belegwa gore o se kote moriri wa gago goba go nwa bjala; goba gopola o ntšhwa nageng ya geno o sa le moswa, kgole le tumelo ya gago le balapa, go hlankela moetapele yo šele – yo a nago le maatla a bophelo le lehu go wena; goba nagana o kgethilwe go phela lešokeng gomme o apara diaparo tše dirilwego ka boya bja kamela, o e ja todi ya dinose le ditšie. Simsone, Daniele le Johanese Mokolobetši, ka go latelana, ba be ba kgethilwe go hlankela Modimo (Baahlodi 13; Daniele 1; Mateu 3).
Ye ke mehlala ka Bibeleng ya go phela ka bokgethwa kudu ya kemedi ye nnyane ya batho ba Modimo a ba biditšego. Le ge go le molaleng gore go bile boima go yo mongwe le yo mongwe go ba yo a fapnego le go phela kgahlanong le kganetšo go tšwa go dithaka tša bona ka lebaka la bjona, ka moka ba phethagaditše merero ya Modimo ya maphelo a bona. Modimo ka mehla o matlafatša batho ba a ba bitšago gomme maatla a gagwe a tiile bofokoding bja bona (2 Bakorinte 12:9).
Nagana ka bophelo bja gago. Naa o ka bona bohlatse ka gare go bjona bja Modimo a go hlaola go mo hlankela; goba bohlatse bja seo o kgethago go direla yena, seo se go hlaolago go dithaka tša gago? Ge o gafa bophelo bja gago go hlankela Kriste, o lemoga gore go na le dilo go tšwa bophelong bja gago bja kgale tše di sa go kgomago, eupša tšeo di swanetšwego go tlogelwa morago gore o kgone go ba yo a ikgafilego ka mo go feletšego go Morena. Paulose o boditše Baefeso gore “le se sa phela ka mokgwa wola wa lena wa pele; lahlang tlhago ya lena ya kgale ye e senywago ke ditumo tša lena tša bofora. Mokgwa wa lena wa go nagana o swanetše go mpshafatšwa, gomme le tšee tlhago ye mpsha ye e hlodilwego ka go swantšhwa le Modimo, le phele le le baloki ba nnete le bakgethwa ba nnete.” (Baefeso 4:22-24)
Tšhomišo ya Petrose ya seswantšho sa batho ba Modimo bjalo ka bašele, badudi ba nakwana ba lefase le, e a thuša. Bjalo ka badudi ba legodimong ga re lebale yo re mo hlankelago, goba go lahlegelwa ke ditekanyetšo tša rena gomme, ka go realo, ra tsena ka setšong sa go nyatša Modimo.
Bokgethwa ke taelo, ga se fela selo se sebotse seo re ka se oketšago go maneneo a dilo tše re nyakago go di dira – “le lekeng le go phela bophelo bjo bokgethwa, ka gobane ga go yo a tlago bona Morena a sa phele ka mokgwa woo” (Baheberu 12:14).
A re thomeng go ntšha selo sefe goba sefe maphelong a rena seo se tlago magareng ga rena le Modimo, selo sefe goba sefe se e sego se sekgethwa, gomme re tsepeleleng go utolla ditsela tša gore re be bjalo ka yena. A re kgopeleng yena go re lemoša mafelo a diphošo maphelong a rena le go a tloša; o tla re thuša go obamela.
