Dira phapano – Letšatši la 13

Ke ka yena mo le dumelago go Modimo yo a mo tsošitšego bahung a mo godiša; gomme bjale tumelo ya lena le kholofelo ya lena di tsepeletše go Modimo. 1 Petrose 1:21

Naa o ka nagana moo re ka bago re le gona ka ntle le Morena Jesu Kriste? Ka yena, re dumela go Modimo – gomme ke lerato la rena, seetša sa rena le mothopo wa tšohle tše botse tše re itemogelago tšona maphelong a rena! Ga go a ba le motho yo a swanago le motho wa Jesu Kriste yo a utolotšwego historing ka moka; banna ba bagolo ba bile gona le go hlokofala, eupša bogolo bja bona ga se bja batamela kgauswi le seabe se Jesu a bilego le sona lefaseng. O hlompšha ke balatedi ba ditumelo tše dingwe.

Go latela Jesu go na le maatla le go ba mafolofolo, gomme le gatee ga se “boitshwarong bjola bja lena bja go se be le mohola bjo le bo tšerego go borakgolokhukhu ba lena” (1 Petrose 1:18). Go e na le moo, go mo latela go mabapi le bophelo ka lehu la gagwe le bophelo ka bophelo bja gagwe; bophelo bjo bo sa felego le bophelo bjo bo feletšego. Ge e le gabotse, ke yena bophelo bja rena gomme maatla a gagwe a itemogelwa ka tsela ye maatla bjale, go feta ge a be a sa le lefaseng, ka lebaka la bohlale bja mošomo wa Moya wo Mokgethwa khuetšong ya yona maemong a mantši sammaletee le bokgoni bja gagwe go fihla kgole le kgauswi. Ka lebaka la Jesu, Bokriste ga se bodumedi bjo bo hwilego: ke bjona fela bjo bo batametšago motho kgauswi le Mmopi wa gagwe, Modimo Ramaatlaohle wa lefase, ka tsela ya tswalano ya kgauswi gomme e se ka mokgwa wa go itlwaetša.

Sehlabelo sa Kriste go rena bjalo ka “kwana ye e se nago bosodi goba lebadi” (1 Petrose 1:19) go Modimo yo Mokgethwa go na le boleng bjo bohlokwa. Re ka kgopela eng se segolo go e na le go ba le Modimo yo a re ratago kudukudu moo e lego gore o tshwenyaga ka bophelo bja rena lefaseng le, gape le moo re tla fetšago go ya go ile; kudukudu moo a gafago bophelo bja gagwe bjo bo se nago bosodi, gore ka maadi a bohlokwa a gagwe re ka rekollwa bokgobeng bja go dira dibe le go ba le bophelo bjo bo sa felego. Ga go na tumelo ye nngwe ye e šišinyago modingwana wa yona a itira sehlabelo go balatedi ba gagwe, re sa bolele ka lefase. Ge re kwešiša tše ka moka, re thabela bohlokwa bjo bogolo bja Jesu go lefase le.

Jesu o feditše mengwaga ye meraro a ruta barutiwa ba gagwe ka mmušo wa Modimo le leano la gagwe la go makatša go fihlelela lefase. Le fihleletše nna le wena.

Naa o tla le fetišetša pele?