Dikholofetšo tše botse tša Modimo – Letšatši la 12

Paulose o ngwetše lengwalo la go ya go Baroma kua Korinte ka AD 56-57 pele a ka ya Jerusalema go yo tšea dineo tša badumedi fao. Go e na le go ithekga ka Foibe, motikone, go iša lengwalo Roma, o be a nyakile go ya ka noši. Ka gobane o be a duma go ya Roma gomme a bege Ebangedi fao.

Tshepo ya gagwe e be e le go hloma lefelo magareng ga bagwera ba gagwe kua Roma gomme ge se se phethagetše, go sepela le bathekgi ba bona go ya Spania go yo bega go ya pele taba ye botse ya Modimo ka Jesu Kriste.

Tshepo ya Paulose lega go le bjalo ga e ya phethega ka tsela ye e bego a holofetše. O ile a atlega go ya Roma morago ga mengwaga ye mebedi, eupša e se ka thato ya gagwe eupša bjalo ka mogolegwa yo a bego a emetše go sekišwa a tlemilwe ka diketane.

Bibele e re botša gore go dineo tša moya, kholofelo ke ye nngwe ya dineo tše tharo tše bohlokwa. Tše dingwe tše pedi ke tumelo le lerato. Letšatši le lengwe ge re le legodimong tlhoko ya kholofelo le tumelo e tlo fela gomme gwa šala lerato.

Batho ka moka ba kganyoga kholofelo – kholofelo ya go phela bophelo bjo bokaone, kholofelo go ditswalano tša motho, kholofelo ya phodišo. Dikholofelo tša rena di ka se phethege ka tsela ye re nyakago ka gona eupša re na le monyetla wo bohlokwa kudu wa go ka fihlelela kholofelo ye kgolo.

Kriste ke mothopo wa kholofelo, ntle le Kriste ga gona kholofelo. Ka Kriste, go sa šetšwe ka fao maemo a rena e lego a tlalelo ka gona, go na le kholofelo ka mehla.

Kholofelo ga se selo se re kago se fihlelela ka noši, kholofelo ke neo go tšwa go Moya wo Mokgethwa go bao ba lego kopanelong le Kriste.

Go sa šetšwe kgatelelo ye re lego ka tlase ga yona, Modimo wa kholofelo o re holofetša lethabo le khutšo ge re ka bea tshepho ya rena go yena.