Dikholofetšo tše botse tša Modimo – Letšatši la 13

Ge fela re ka ba le tumelo ya molaodi wa Moroma yo a tlilego go Jesu kua Kapernaume gomme a mo kgopela go fodiša mohlanka wa gagwe yo a bego a lwala kudu.

Ge Jesu a re o tla ya a fodiša mohlanka, molaodi a tshepha Jesu, a re: “Eno bolela lentšu le tee, gomme mohlanka wa ka o tla fola.” Phetolo ya gagwe ya makatša Jesu gomme a botša batho ba ba bego ba mo latela: “Ruri, ke a le botša, ga se ka ka ka hwetša motho yo a nago le tumelo ye kaaka mo go Baisraele.”

Go tumelo ya bodumedi ya Bakriste tumelo, kholofelo le lerato ke dikgaugelo tše tharo tše bohlokwa. Tumelo e bolelwa gantši go e na le kholofelo goba lerato ka go Testamente ye Mpsha.

Bakriste ba mmalwa, ge ba na le nnete, ba tla bea tumelo ya bona boemong bjo swanago le bja molaodi. Ba rena ba bantši re na le semelo sa moapostola Thomase yo a bitšwago “Thomase makgolwa-ka-go-bona”. Ka lebaka la dipelaelo tša rena, tumelo ya rena gantši e ba tiro ya bohlale ge re leka go bea mabaka a se re dumelago go sona.

Re se nyatše Thomase, e be e le monna wa sebete, a ikemišeditše gaešita le go hwela Jesu (Johanese 11:16). Lega go le bjalo,morago ga go bapolwa ga Jesu ga se a ke a kgolwe gore Jesu o tsogile bahung (Johanese 20:25).

Gomme Jesu a tšwelela ka ntlong ya ka godimo mo barutiwa ba bego ba kopane gomme a botša Thomase go bea monwana wa gagwe go mabadi a dipikiri matsogong a gagwe, le letsogo la gagwe lehlakoreng la gagwe. A botša Thomase gore a tlogele go belaela gomme a dumele.

Thomase a lemoga gore o bogoneng bja Morena yo a tsogilego bahung gomme a bolela boipobolo bjo bogolo bjo bo hwetšwago ka go Testamente ye Mpsha: “Morena wa ka le Modimo wa ka!”

Ke boipobolo bjo ka moka re hlokago go bo dira. Re hloka go tiiša bjalo ka ge Paulose a dirile: “… gomme ge ke phela ga e sa le nna yo a phelago, eupša ke Kriste yo a phelago mo go nna. Bophelo bjo ke bo phelago bjale ke bo phela ka go dumela go Morwa wa Modimo yo a nthatilego gomme a ikgafa ka lebaka la ka” (Bagalata 2:20).

Tumelo ke tswalano ya motho ye e bago gona ge modiradibe yo a fetogago a e ba le tswalano le Kriste.

Re mahlatse kudu go ba karolo ya lapa la Modimo gobane “Morena o botegela dikholofetšo tšohle tša gagwe, le gona o na le botho go tšohle tše a di dirago” (Pesalome 145:13).