BAROMA 15

₁Rena ba tumelo ye e tiilego re swanetše go rwadiša ba tumelo ye e fokolago mathata a bona mo go tša tumelo. Re se ikgahliše. ₂Motho a kgahliše modumedikayena ka go mo direla tše di mo holago, a mo age mo go tša tumelo. ₃Gobane Kriste le yena o be a sa ikgahliše; eupša go bile bjalo ka ge Mangwalo a Makgethwa a bolela a re: “Ke wetšwe ke mahlapa a bao ba go rogago.” ₄Tšohle tše di ngwadilwego ka Mangwalong a Makgethwa mehleng ya kgale di ngwaletšwe go re ruta, gore re tle re be le kholofelo ka go se fele pelo le go tiišwa ke tše di ngwadilwego. ₅A Modimo yo a re kgontšhago go se fele pelo, gape a re tiišago a dire gore le phedišane ka kwano go ya ka moo go kgahlago Kriste Jesu, ₆gore le tle le tumiše Modimo, TatagoMorena wa rena, Jesu Kriste, mmogo ka molomo o tee.

₇Ka gona, le amogelaneng bjalo ka ge Kriste le yena a le amogetše, mme e be gona go tumiša Modimo. ₈Gomme ke le botša gore Kriste o be a tletše go hlankela Bajuda ka go phetha tše Modimo a di holofeditšego borakgolokhukhu ba rena, go bontšha gore yena Modimo o a botega, ₉le go dira gore baditšhaba ba tle ba tumiše Modimo ka ge a na le kgaugelo, bjalo ka ge Mangwalo a Makgethwa a re:

₁₃Anke Modimo yo a le fago kholofelo a dire gore ka ge le mo dumetše, le be le lethabo le khutšo ka botlalo, gore kholofelo ya lena e fele e oketšwa ke Moya wo Mokgethwa ka maatla a wona.

₁₄Banabešo, nnaena ke tloga ke dumela gore le na le botho e le ruri, le gore le tseba ka botlalo se motho a swanetšego go se dira, ebile le kgona le go eletšana. ₁₅Fela mo lengwalong le ke tloga ke betile pelo ka ngwala ditaba tše dingwenyana tše ke le gopotšago tšona. Ke bile le sebete ka ge Modimo a bile yo botho go nna, ₁₆ka go ntira mohlanka wa Kriste Jesu wa go begela baditšhaba Taba ye Botse ya Modimo. Ge ke dira bjalo ke dira modiro wa boprista, gore baditšhaba e tle e be sehlabelo se se kgahlago Modimo, se a se abetšwego ke Moya wo Mokgethwa. ₁₇Ke ka lebaka leo ke nago le lebaka la go ikgantšha ge ke šomela Modimo, ke le wa Kriste Jesu. ₁₈Nka se bete pelo ka bolela tše dingwe ntle le tše Kriste a di dirilego ka nna go ruta baditšhaba go theeletša Modimo. Seo o se dirile ka dipolelo le ka mediro, ₁₉ka maatla a mehlolo le a dimakatšo, le ka maatla a Moya wa Modimo. Ke ka lebaka leo ke gašitšego Taba ye Botse ye ya Kriste ka botlalo gohle mo ke fetilego gona, go tloga Jerusalema go yo fihla Ilirikomo. ₂₀Se ke bego ke se fišegela ke go gaša Taba ye Botse ye moo batho ba bego ba sešo ba kwa ka Kriste, gore e se tlo ba nke ke aga motheong wa yo mongwe. ₂₁A go be bjalo ke ge Mangwalo a Makgethwa a bolela a re:

₂₂Ke yona taba ye e mpaledišitšego gantši go le etela. ₂₃Fela bjale ga go sa na modiro wo nka o dirago mo dinageng tše, le gona e šetše e le mengwaga ye mentšinyana ke duma go tlo feta moo go lena ₂₄ge ke eya Spania. Ke mo ke holofelago gore ke tla feta ke le bona la mphelesetša gona ka morago ga ge ke ile ka iketla le lena sebakanyana. ₂₅Gonabjale ke sa ya Jerusalema go yo thuša badumedi ba gona. ₂₆Gobane diphuthego tša Matsedonia le tša Agaya di kgahlilwe ke go kgobokeletša bahloki gare ga badumedi ba Jerusalema dimpho. ₂₇Seo ke se ba ithaopilego go se dira; fela gabotsebotse ba tlemegile go ba thuša, gobane ka ge Bajuda ba abelane le baditšhaba tša moya, baditšhaba le bona ba lebanwe ke go thuša Bajuda ka tša nama. ₂₈E tla re ge ke phethile mošomo wo ke bile ke ba file tšhelete ka moka ye ba e kgobokeleditšwego, ka tšea leeto la go ya Spania mme ka feta ke le bona. ₂₉Ke a tseba gore mohla ke etla go lena ke tla le kgopelela tšhegofatšo ye e feletšego ya Kriste go Modimo.

₃₀Bjale ge, banabešo, ke le kgothatša ka Morena wa rena Jesu Kriste le ka lerato le Moya o re fago lona, gore le nthapediše Modimo ka phišego. ₃₁Le nthapelele gore ke se wele diatleng tša bahlokatumelo ba naga ya Judea, le gore tše ke thušago badumedi ba Jerusalema ka tšona di ba kgahle. ₃₂Ke mo ke tlago tla go lena ke thabile, ge Modimo a rata, ka lapološwa ke go ba le lena. ₃₃Modimo yo a re fago khutšo a be le lena. Amene.