A ka kgona … – letšatši la 4

Se go bego go swanetše go ba mosegare wa boiketlo le dimpša tša bona, se feleleditše e le masetlapelo ge baratani ba Cape Town ba ile ba hlasela ke mokgobo wa dinose tikologong ya Macassar. Di lomile monna makga a 50 gomme ge a thoma go ruruga le go palela ke go hema, morwedi wa gagwe a mo nametša koloing a mo kitimišetša sepetlele.

Moela wa dikoloi go ya Somerset West o be o tsamaya ka go nanya gomme kgakanego ya monna ya oketšega. Morwedi wa gagwe a ema go maphodisa a go hlapetša sephethephethe ao a bego a dirile lepheko tseleng gomme a ba kgopelo thušo. Ge ba bona papagwe, ba bangwe ba bona gateetee ba tsena ka dikoloing tša bona, ba ba felegetša ba letša disaerine gape ba tšhumile mabone a matala go ya sepetlele. Bophelo bja tatagwe bja phološwa gomme o sa fola.

Maphelong a rena, gape re itemogela ditlhohlo nako le nako. Di ka ba gona lefelong la mošomo, gae, boemong bja rena bja tša maphelo, ditswalanong tša rena goba gaešita le boemong bja rena bja tša ditšhelete. Maemo a kgakanego a baka kgateletšego gomme, ka dinako tše dingwe, a dira gore go be boima gore re heme gabotse. Ge re nagana kudu ka wona, go bonala eke a mpefala.

Lega go le bjalo, Modimo o tseba ka kganego ye nngwe le ye nngwe gomme re ka kgopela Yena thušo. Go Pesalome 91:1,11,15 re bala gore, “Yo a lego ka lehwafeng la Ramadulagodimo, a dulago a šireleditšwe ke Ramaatlaohle … Modimo o tla laela barongwa ba gagwe gore ba go hlokomele, ba go šireletše gohle mo o yago gona … Ge a nthapela ke tla mo kwa; ge a le mathateng ke tla ba le yena. Ke tla mo hlakodiša, ka mo hlompha .” Gomme go 1 Petrose 5:7 re bala gore, “Mathata a lena ohle le a lahlele go yena, gobane o a le šetša.”
Ke eng dipelaelo le ditlhohlo tša gago lehono? A re “eme” gomme re kgopele Modimo go thuša le go tshepha Yena le ge go sena se re se kwešišago. A ka thuša gomme ka dinako tše dingwe o šomiša batho ba ba sa tlwaelegago gape bao ba sa letelwago (le gaešita barongwa) go re “ntšha” ka gare ga kgakanego le go re tliša ka pela go boyo bja rena le phenyo. Modimo a go šegofatše.

Mošomo wa letšatši: Dira lenaneo la dilo ka moka tše o tshwenyegago ka tšona. Bolela le Modimo ka tšona – gomme o di tlogelele Yena. Ge o e ba le gateletšego gape, thoma go rapela Yena ka se Yena a lego kgauswi le go se dira bophelong bja gago.