A ka kgona … – letšatši la 3

Go klipi ya bidio ye ke e bonego kuranteng ya inthaneteng, Telegraph, seboka sa ditau kua Mala Mala Game Reserve, kua Afrika Borwa, se dikologile nare. Di ikemišeditše go gagara nare, ge ntwa e thoma magareng ga ditau tše pedi. Dipoelo? Ditau ka moka di a šitišwa, di tlogela nare go tšhaba.

Selo sa go swana se diragetše go 2 Dikronika 20. Dihlopha tše tharo tša madira di be di le tseleng go yo hlasela Kgoši Joshafate le madira a gagwe. Joshafate o tsebile gore ba be ba tlo fedišwa. Ka go tšhoga, a tsebagatša letšatši la go itima dijo le thapelo setšhabeng go nyaka thušo ya Modimo. Go 2 Dikronika 20:17 re bala kholofetšo ye ba e hweditšego go tšwa go Modimo: “Ntwa ye le ka se e lwe. Lena le no ema maemong a lena le letele; le tla bona manaba a lena Morena a le fenyeditše ona. Lena batho ba Juda le ba Jerusalema, le se ke la dikadika, goba la boifa, goba la nolega moko. Ka moswane le tšweng le yeng ntweng, gomme Morena o tla ba le lena!”

Ka kholofetšo ye, Joshafate le madira a gagwe ba ya ntweng ka letšatši le le latelago. Ge ba opela le go rapela, Modimo a tsenya kgakanegong banna ba Amone le Moaba le Thaba ya Seire bao ba bego ba šwahlela Juda, gomme ba fenywa. Joshafate le madira a gagwe ba se ke ba hlaselwa.

Go Jesaya 54:18 re bala gore: “Eupša wena ga go sebetša se o tlago hlaselwa ka sona sa go gobatša. Bohle bao ba go pharago ka molato tshekong o tla ba bontšha gore ke bona ba nago le molato. Ke ka moo ke tlago dira gore bahlanka ba ka ba bolokege, ka dira le gore ba fenye.” O realo, Morena.” Gape go Doiteronomio 28:7, re bala gore: “Morena o tla dira gore le fenye manaba ge a le hlasela.”

Ka gobane Modimo o tseba tlhaselo ye nngwe le ye nngwe lenaba (leo le bonwago le go se bonwe) le e akanyago kgahlanong le wena, A ka re šireletša – le go gakantša maano a lenaba. Go e na le go tšhoga ge re ikwela eke re bjalo ka nare ye e dikologilego ke seboka sa ditau, a re bitše Modimo, bjalo ka ge Joshafate le batho ba dirile, re tshepha Modimo ka phenyo. Ga go se se mo palelago Yena. Modimo a go šegofatše.

Mošomo wa letšatši: Nagana nakwana ka lenaba (motho goba seemo). Kgopela Modimo go go tlatša ka bohlale go ka šogana le seemo seo.