A ka kgona … – letšatši la 7

Nakong e fitilego, Stephen Rogata wa mengwaga ye 19, o ile a swara kua New York, United States morago ga go namela Trump Towers ka dikgomaretši tša lebotong le dithapo. O be a nyaka go fihla go Donald Trump. Rogata o tšwetše pele go fihla lebatong la 21, pele maphodisa a mo swara. O ile a latofatšwa ka bosenyi ka tiro ya gagwe.

Ke ipotšiša gore e be e le eng selo se bohlokwa go lesogana le, sa gore a bee bophelo bja gagwe kotsing go ka fihla go Donald Trump? Ke eng se a bego a nagana gore ke Trump fela yo a bego a ka mo thuša ka sona?

Ge ditlhohlo maphelong a rena di tšhošetša go ka re aparela, gabonolo re wela ka gare ga molaba wa go swana le wa lesogana le. Ka gobane di re tlatša ka letšhogo le go re dira gore re be le maatla, re ba tlalelong. Tlalelong ya rena, re lahlegelwa ke maatla a go nagana gabonolo. Ke ka nako yeo re thomago go lwešana le maatla a rena – ka lenyalong la rena, bjalo ka motswadi, tikologong e šoro ya mošomo goba le gaešita ge re leka go fihlelela ditoro tša rena ka borena. Ka ntle le go ka lemoga ka dinako tše dingwe, re ba bjalo ka lesogana le, re bea tumelo le tshepo ya rena go batho, go e na le go Yo a hlodilego batho ka moka.

Modimo o nyaka gore re bolele le Yena mabapi le dilo tše di tšhošetšago go ka re aparela. A ka homotša ledimo ka gare go rena le go re tlatša ka khutšo. Go Jakobo 4:8 re bala gore: “Batamelang Modimo, gomme le yena o tla le batamela.” Go 1 Johanese 5:14 re bala gore: “Re ka ya go Modimo re sa šie, ka ge re tseba gore ge re mo kgopela go ya ka thato ya gagwe o a re kwa.” Go Bafilipi 4:6-7 re bala gore: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

A re beeng fase dikgomaretši tša lebotong le dithapo gomme re ye ka tumelo go Yena ge re imelwa. A re dumelele Yena go re tlatša ka khutšo a le gare a re bontšha bogolo bja Gagwe. A ka homotša madimo a a re dikologilego le go re tlatša ka maatla a go nagana a a mpshafaditšwego. Modimo a go šegofatše.

Mošomo wa letšatši: Ngwala lenaneo la dilo bophelong bja gago tše di go fago kgatelelo ya monagano. E fa Modimo dilo ka moka le go dumelela Yena go di rarolla legatong la gago.