A ka kgona … – letšatši la 6

Matšatši a mabedi morago ga ge monna wa Norma Jean Bauerschmidt, goba “Mohumagadi Norma” wa Michigan kua America, Leo, a hlokafetše, o ile a amogela ditaba tša go makatša tša gore sešo sa kankere se ile sa hwetšwa mmeleng wa gagwe. Morwa wa gagwe le ngwetši wa gagwe ba be ba na le yena kantorong ya ngaka. Ngaka e ile ya šišinya setšari, radiešene le khomotherapi. Ge a botšišwa gore o nagana eng ka yona, Mohumagadi Norma a fetola, “Ngaka, ke na le mengwaga ye 90. Se ke nyakago go se dira ke go bona lefase.” Ke sona seo yena, morwa wa gagwe, le ngwetši ya gagwe ba se dirilego.

Nakong ya ngwaga, ba sepetše dikilometara tše 21 000 ka kharabane ya bona ye ba robalago ka gare ga yona, ba robala ka go yona mafelong a go fapanafapana a 75 go ditoropo tše 32 tša Amerika. Nakong ye, ba bile le maitemogelo a mabotse lekga la mathomo – go akaretša go namela paluni ya moya ya mollo, ba ja dikgetla (di-oyster), ba raloka ukulele, ba bona maruarua lekga la mathomo, ba namela dipere le gaešita go etela polase ya matšoba a phepolo (matšoba a gagwe a mmamoratwa). Mahlagahlaga a bona, a bitšwago “Go otlela Mohumagdi Norma”a ile a latelwa inthaneteng ke batho ba go feta seripa sa milione bao ba kgahlilwego ke moya wa gagwe wa lethabo ka gare ga go se phele gabotse ga gagwe mmeleng. Se tee sa diswantšho tša Mohumagadi Norma tša mmamoratwa, mosadi o monnyane wa boima bjo bo ka bago 45 ya dikilokramo, e be e le se a dutšego ka gare ga koloi e khubedu le Ringo, mpša ya bona ya mmamoratwa kgauswi le yena, yeo e bego e ya gohle le bona. Batho ba be ba sa lemoge gore o be a šetše a fokola ka nako yeo ka thanka ya oksitšene maotong a gagwe. Se e be e le ye nngwe ya mahlagahlaga a gagwe a mafelelo.
Ge Mohumagadi Norma a hlokafala, batho ba ile ba keteka bophelo bja gagwe ka botlalo kua Boemakepe bja Friday kua Toropong ya Washington.

Go 1 Bathesalonika 5:18 re bala gore “Dilong ka moka sa lena e be go leboga, gobane tšeo ke tšona tše Modimo a di nyakago mo go lena ge le le ba Kriste Jesu.” Go Jeremia 29:11 re bala gore, “Ke nna fela ke tsebago merero ye ke le reretšego yona, merero ya katlego, e sego ya tahlego, merero ya bokamoso bjo bo holofetšago.” Go Johanese 10:10, Jesu o rile, “Nna ke tletše gore dinku tša ka di phele – di phele bophelo bjo bo feletšego.”

Modimo a ka re thuša go itemogela bophelo bjo bo feletšego go sa šetšwe madimo a a lego gona mafelong a rena a mošomo, gae, boemong bja rena bja tša maphelo goba gaešita ditšheleteng tša rena. Re swanetše go tšea sepheto sa go ka tsepelela e se go ledimo leo le tlago re tšhoša, eupša go Motho yo a kago homotša ledimo ka lentšu le tee fela.

Ge a be a botšišwa gore boyo bja gagwe bja mmamoratwa ke bofe ka nako yeo, Mohumagadi Norma a fetola lekga le lengwe le le lengwe, “Gona moo.” O be thabile ka letšatši le lengwe le le lengwe le ka boitemegolo bjo bongwe le bjo bongwe go sa šetšwe ledimo go dikologa boemo bja gagwe bja tša maphelo. Se ke ka lebaka leo a ilego a itemogela bophelo bjo bo feletšego go fihla mafelelong. A re latele mohlala wa gagwe le go phela ka go leboga ka gare ga boemo bjo bongwe le bjo bongwe. Ka go dira se, le rena re tla itemogela bophelo bjo bo feletšego, le ge re itemogela madimo maphelong a rena. Modimo a go šegofatše.

Mošomo wa letšatši: Ke madimo afe ao a tšutlago bophelong bja gago? Hwetša pene le pampiri gomme o ngwale dilo tše tharo tšeo o kago di leboga le ga go e na le madimo. Leboga Modimo ka seo.