A ka kgona … – letšatši la 8

Megokgo e ile ya elela sefahlegong sa waitara ya mengwaga ye 23 ge a lebelela lephephe la mogolo wa gagwe. E se gore diklaente ga di a mo fa tšhelete ya ditebogo, eupša ka lebaka la mantšu a šoro a ba bego ba a ngwetše lephepheng. Se, le ge a ba swere ka botho nakong ka moka ya ge ba e ja dijo tša bona. Ka lebaka la mmala wa letlalo la gagwe, ba ile ba gana go mo fa tšhelete ya ditebogo.

Bareki ba babedi ba tšwetše pele ba phara seswantšho sa rasiti mekerong ya poledišano ya inthaneteng. Ge ba be ba nagana gore ba tla amogela thekgo ka tiro ya bona, maloko a setšhaba a ile a befela kudu. Seswantšho le kanegelo di ile tša phatlalala bjalo ka mollo wa hlaga gomme lesolo la go kgoboketša tšhelete ya waitara la thoma le semeetseng. Ka matšatši a mmalwa, waitara a amogela tšhelete e ntši (go feta ye diwaitara tše dingwe di e dirago ka ngwaga).

Phetolo ya waitara ka poso ya Facebook morago ga go amogela tšhelete, e ile ya nkgwatha. O ngwetše gore, “Ke thabile kudukudu. Ga go mantšu a a ka hlalošago ka fao ke ikwago ka gona. Mma o hweditšwe a e na le kankere gomme ke tlogetše mošomo wa ka go mo hlokomela, ka tšhelete ye ke tla kgona go dira seo.” E ka Modimo o tsebile ka seemo sa gagwe? Ee.

Josefa o bile boemong bjo bjalo. A lahlwa ke bomorwarragwe gomme morago, gape ke Potifaro, gomme a lahlelwa kgolegong Egepeta. Mo go tšhohle, a tshepha Modimo, a tseba gore Yena o sa laola dilo ka moka. Ka letšatši le tee, Modimo a phagamiša Josefa go tšwa go mogolegwa go ya go motho wa bobedi yo a bego a na le taolo kua Egepeta.

Ge bomorwarrago Josefa ba tla go reka dijo nakong ya tlala, ba ile ba thothomela ka letšhogo ge ba lemoga gore ba eme pele ga gagwe. Theetša mantšu a gagwe go bona: “Le ile la rera go ntira bobe, eupša Modimo a fetoša bobe bjoo botse, gore a tle a dire se re se bonago lehono, e lego go phološwa ga batho ba bantši” (Genese 50:20). Go Pesalome 25:9 re bala gore: “O etetša baikokobetši tseleng ya go loka, mme a ba ruta thato ya gagwe.” Modimo ka maano a bea Josefa moo a bego a tla kgona go hlokomela lapa la gagwe nakong ya tlala nageng. E ka ba o be o tla feletša fao ka tsela efe goba efe ye nngwe? Ke a belaela..

Ke eng tlhohlo ya gago lehono? Molaodi wa go se kwešiše goba bašomi-ka-wena ba ba thata bao ba go tlogelago o gatellegile gape o nolegile mooko? Tlhohlo bophelong bja gago ye e befago letšatši le letšatši? Modimo a ka fetoša boemo bja gago ka letšatši. A re ithuteng go tšwa go waitara gape le go bophelo bja Josefa ka go phela re botega go Yena, re tshepha gore O kwešiša boemo ka botlalo le gore O šoma ka maano bophelong bja gago. Modimo a go šegofatše.

Mošomo wa letšatši: Ngwala lenaneo la ditlhohlo tše o kopanago le tšona lehono. Le fe Modimo gomme o thome go leboga Yena e sa le pele gore O gare O go lokišetša dilo.