Wie is God – Dag 20

As ons ʼn voorwerp wil vertoon, sal ons dit op ʼn plek sit waar dit die beste lig kry of selfs kunsmatig die lig so stel om die voorwerp te beklemtoon sodat almal dit kan sien en bewonder. By vertonings of konserte word ʼn soeklig gebruik sodat die ster sigbaar kan wees. Hoeveel te meer dan sal God, die Almagtige Here van die skepping, nie deur skitterende lig omring wees nie?

1 Johannes 1:5-7 verduidelik ʼn verdere aspek van ons vraag: “Wie is God?” Hy is lig; in Hom is daar absoluut geen duisternis nie en in 1 Timoteus 6:16 lees ons: “… Hy woon in ontoeganklike lig.” Indien ons moes raai sou dit seker ons antwoord gewees het want dit is wat ons verwag. Dit maak sin dat die Goddelike Majesteit met groot heerlikheid en glans belig word en nie in die duisternis weggesteek word nie. Die Bybel maak dit ook hier duidelik dat lig en geregtigheid sinoniem is, en dat diegene wat nie aan Hom deel het nie, in die duisternis lewe.

Wanneer ons hieroor nadink, is dit duidelik dat byna elke konnotasie met lig iets positiefs bevat. Eerstens sien ons goed in die lig, maar ons struikel in die donker; mense is nie bang vir die lig nie, maar baie volwassenes en kinders is bang vir die donker; lig is baie belangrik vir lewe, sonder dit het ons nie warmte of gunstige toestande vir groei nie; dit help selfs om ons Vitamien C- en D-vlakke ʼn hupstoot te gee wat ons gesonder maak, en in sonskynweer is mense minder geneig tot terneergedruktheid in teenstelling met diegene wat lang, donker winters beleef. In ons lewens is lig daarom baie belangrik. Benodig ons dan nie in ons geestelike lewe ook die lig nie?

Toe God die hemel en die aarde geskep het en daar net duisternis oor die vormlose niks was, het Hy die lig eerste geskep. “Toe het God gesê: ‘Laat daar lig wees!’ En daar was lig. God het gesien die lig is goed, en Hy het die lig en die donker van mekaar geskei” (Genesis 1:3-4). So leer ons: God het die lig geskep en Hy is lig. Hy sal nooit in die duisternis wees nie, nie fisies of geestelik nie. Maar wat van ons?

In die Nuwe Testament, wanneer Paulus vir die kerk in Korinte sê om nie saam met ongelowiges in dieselfde juk te trek nie, vra hy ook die vraag: “Hoe kan daar vennootskap wees tussen reg en onreg? Hoe kan daar gemeenskap wees tussen lig en duisternis?” (2 Korintiërs 6:14). Ons moet onsself vra: “Waar is ek in die groot prentjie? Is ek in die lig of in die duisternis?”

Die enigste manier hoe ons in die lig kan bly, is om ons elke dag in God se Woord te verdiep. “U woord is die lamp wat my die weg wys, die lig op my pad” (Psalm 119:105).