Rig jou geloofsoog op Hom – Dag 3

Die Korintiërs het gekla dat Paulus nie heeltemal openhartig en eerlik met hulle was nie. Alhoewel hy belowe het om Korinte weer te besoek, het hy twee keer kop uitgetrek. Was Paulus onopreg? Het hy agter ander se rug planne gemaak om homself te bevoordeel?

Paulus spreek hierdie vrae aan in 2 Korintiërs 1:12-14. Hy is trots daarop dat sy gedrag teenoor die Korintiërs in alle opsigte deursigtig en eerlik was. Hy het sy besoeke gekanselleer, nie om homself te bevoordeel nie, maar omdat hy nie weer ʼn keer die Korintiërs wou bestraf nie. Hy het dus sy besoek vertraag omdat hy, wanneer hy wel terugkom, geluk wou bring eerder as om hulle te beskuldig en te berispe.

Alhoewel Paulus se integriteit hier bevraagteken word, het hy geweet dat hulle hom sou vertrou op grond van sy deursigtigheid en eerlikheid teenoor hulle in die verlede. Hy herinner hulle dat hy altyd met die openhartigheid en eerlikheid wat van God kom teenoor hulle opgetree het.

Ons vereis deursigtigheid van ons regering, ons base en ons vriende, maar is ons deursigtig en kan mense ons vertrou? Ons kom daagliks in die versoeking om die waarheid weg te steek. Gee ons voor dat ons ʼn kollega ondersteun net om hom agter sy rug te beswadder? Hierdie voorbeeld van Paulus maak dit duidelik dat dit verkeerd is.

En as mense ons nie kan vertrou nie, kan God ons vertrou?