God se beloftes – Dag 8

Belangrike en dramatiese ontmoetings tussen God en die mens het dikwels op berge of heuwels plaasgevind.

Moses het die tien gebooie op Sinaiberg ontvang.

Dit was op ʼn hoë berg waar Petrus, Jakobus en Johannes die verheerliking van Jesus aanskou het. Hulle het God hoor sê: “Dit is my geliefde Seun oor wie Ek My verheug. Luister na Hom” (Matteus 17:5).

Dit was op die Olyfberg waar Jesus aan sy dissipels gesê het dat hulle almal Hom daardie nag sou verlaat. Daar onder die olyfbome in Getsemane het Hy gebid, en is Hy verraai en gevange geneem.

Dit was daar op die heuwel van Golgota, die Kopbeenplek, waar Jesus, verlate van hulle wat die naaste aan Hom was, sy lewe vir jou en vir my gegee het. Hy het dit gewillig en met liefde gedoen en selfs die donkerste dag in die geskiedenis van die wêreld vir ons te verlig met ʼn belofte — die belofte van die Heilige Gees waarna ons teksvers vandag verwys.

Die belofte kom egter met ʼn voorwaarde: “As julle My liefhet, sal julle my opdragte uitvoer. Ek sal die Vader vra …” Dit onderstreep God se opdrag aan Petrus, Jakobus en Johannes daar op die Berg van Verheerliking: “Luister na Hom.”

Vandag staan daar kerke en tempels op hierdie berge en heuwels waar die mens ontmoetings met God gehad het. Hierdie plekke word as heilig beskou, maar dit is nie die plekke wat heilig is nie, maar wel ons, die kinders van God.

Jesus beloof aan diegene wat Hom volg dat die Heilige Gees vir ewig by ons sal wees en in ons sal woon; dit is wat ons heilig maak.

Ons is God se tempel en heilig voor sy aangesig. Dit maak nie saak wat met ons gebeur nie, God is altyd by ons tot in ewigheid.