Dagboek 2021 – 7 Mei
Om die dood kalm te kan oordink
Bybelteks(te)
PSALMS 49
Moet jou nie daaroor kwel dat mense ryk word nie
Psalm 49 is geskryf in die wysheidstradisie van Spreuke en Prediker. Die skrywer kom tot die slotsom dat dit nie saak maak wie jy is nie, want wyse mense sterwe net soos dwase en sotte, en laat hulle besittings aan ander na (vers 11). Maar die Psalmdigter word nie mismoedig deur hierdie sombere nadenke oor die dood nie, want hy vertrou dat die Here hom sal loskoop uit die mag van die dood (vers 16).
Die vertroue dat God die Psalmdigter sal red uit die mag van die dood, laat hom toe om sy eie afsterwe met groot kalmte te oordink. Psalm 49 is kenmerkend van ’n ontwikkeling in die ou Israeliete se denke oor die lewe na die dood. Hulle het geglo dat alle mense na hul dood, ongeag daarvan of hulle goed of sleg was, na ’n skaduagtige plek gaan om daar ’n skynbestaan te voer. Daarom dat Psalm 88:12 vra: Word daar in die graf vertel van u troue liefde? En Job 14:10 sê: …die mens sterf en verdwyn.
Die ontwikkeling van die Joodse verstaan van die lewe na die dood mond uit in Christus se aankondiging in Johannes 14 as Hy sê dat Hy vooruitgaan om vir ons ’n plek gereed te maak by sy Vader. Die dood is vir ons as Christene nie hierdie onpersoonlike gebeure nie, maar word intens persoonlik gemaak deur ons Here Jesus Christus. Nie net het ons die vertroosting wat die Psalmdigter het dat God ons sal red van die dood nie, maar deur Christus se genade word ons soos ’n kind ontvang in die huis van die Vader.
Nou kan ons net soos die Psalmdigter die dood vierkantig in die oë kyk en hoef ons nie bedroef te wees nie. Maar meer as dit, ons kan ons lewens leef met ’n nuwe vooruitsig. ’n Vooruitsig gegrond in die wete dat Christus vir ons ’n heerlike toekoms gereed gemaak het by sy Vader. Daarom kan ons saam met Paulus bely: Dood, waar is jou oorwinning? Dood, waar is jou angel? (1 Kor 15:55).
Ds Willem Dreyer, Delareyville
