Dagboek 2021 – 7 Julie

Is dit regtig moontlik dat ’n mens se gebruike en gewoontes belangriker kan wees as om Jesus Christus te ken? Die Skrifgedeelte bevestig dat dit wel moontlik is dat ’n gelowige sy of haar intieme verhouding met ons Here sekondêr kan stel aan ander oënskynlik belangrike dinge. Ek onthou die twis- en strydgesprekke in die kerk toe ek nog ’n jong seun was oor hoede, kleredrag, Nagmaalkelkies en ander sake. Dit kan so maklik vir die kerk net om die gebruike en belange van die kerk gaan! Die teoloog Karl Barth herinner die kerk daaraan dat die kernoorsaak van baie probleme en krisisse in die kerk nie aan eksterne omstandighede en gebeure toegeskryf kan word nie, maar aan die kerk se eie onvermoë om werklik kerk te wees.

Die valse leraars in die gemeente van Filippi het daarop aangedring dat die nie-Joodse bekeerlinge steeds die wette en gebruike van die Jode moes nakom en het die besnydenis as voorwaarde tot werklike bekering gestel. Niks kan ’n persoonlike verhouding met die lewende Here vervang nie. Niks kan in die plek daarvan gestel word nie. Geen gebruik of ritueel kan vir die hart van God instaan nie! Paulus bevestig in Kolossense 2: 11 dat ’n gelowige deur sy of haar verbondenheid met Jesus Christus inderdaad ook besny is. Hierdie besnydenis beteken dat God deur Jesus die sondige natuur van die mens weggesny het. Die besnydenis van die hart (Ro 2:29) kom net deur die Gees.

Christus Jesus oortref alles in waarde. Niks is belangriker as om in ’n verhouding met die Here te leef nie. Hierop kan ’n mens nie roem nie. Ons is een met Christus op grond van sy vryspraak. Nie omdat ons wette en gebruike gehoorsaam nie, maar omdat Hy ons liefhet.

O Heil’ge Gees, ons bid U weer – Gees van ons Vader en ons Heer –
maak van ons hart u woning!
O Lig van God wat in ons skyn; die donker in ons laat verdwyn –
kom vul u tempelwoning!
Kom, Heer, ons Heer; en versier ons met u deugde,
gee ons vreugde.
(Gesang 432: 2)

Dr Frikkie Labuschagne, Sinodaal