Bible Society of South Africa
Leesplanne
Dagboek 2021
Dagboek 2021 – 5 Julie

Dagboek 2021 – 5 Julie

God se deernis bring jou in beweging

Bybelteks(te)

MATTEUS 15

Die tweede vermeerdering van die brood

32Jesus het sy dissipels nader geroep en vir hulle gesê: “Ek kry hierdie mense innig jammer, want hulle is nou al drie dae lank hier by My en hulle het niks om te eet nie. En Ek wil hulle ook nie sonder kos huis toe stuur nie, want hulle kan miskien op pad beswyk.”

33Sy dissipels sê vir Hom: “Waar sal ons in hierdie verlate plek genoeg brood kry om so baie mense kos te gee?”

34“Hoeveel brood het julle?” vra Hy vir hulle.

“Sewe,” antwoord hulle, “en 'n paar vissies.”

35Hy het gesê die mense moet op die grond gaan sit. 36Toe neem Hy die sewe brode en die visse en dank God daarvoor. Daarna het Hy die brood gebreek en dit aan die dissipels gegee, en hulle het dit aan die mense gegee. 37Almal het geëet en genoeg gekry. En die dissipels het nog sewe mandjies vol bymekaargemaak van die stukke wat oorgebly het. 38Daar was vier duisend mans wat geëet het, afgesien van die vrouens en kinders.

39Daarna het Hy die mense huis toe gestuur, in die skuit geklim en na die gebied van Magadan vertrek.

MATTEUS 15:32-39AFR83Maak oop in die Bybelleser

Jesus voed vir die tweede keer ’n groot skare mense op wonderbaarlike wyse by die see van Galilea. Hier word Hy deur duisende mense omring wat elk deur hul omstandighede in bepaalde nood verkeer: verlamdes, blindes, gebreklikes, dowes en nog baie ander. Op ’n gegewe tyd is Jesus diep geraak deur die mense se broodnood: Ek kry hierdie mense innig jammer … hulle het niks om te eet nie.

Hierdie bewuswording was veel meer as net om van die probleem kennis te neem. Die leierskorps het nie net ’n behoorlike evaluasie gedoen en die statistieke op datum gebring nie! Hierdie bewuswording van mense se nood lê op ’n ander vlak, en Jesus leer ons hoe om met die nood van ander te handel. Jesus voel die mense se nood aan sy lyf! Die Griekse woord wat in ons gelese gedeelte met innig jammer vertaal is, het die volgende betekenis: om ten diepste met die nood van ander mense te konnekteer en te identifiseer. Om deernis met ander te hê en deur hul nood in beweging gebring te word. Dit wil tog voorkom asof iets hier binne-in my roer.

Hoe help ons almal om ons terwyl die nood so groot en sigbaar is? Ons voel dikwels soos Jesus se dissipels magteloos en vol wanhoop. Terwyl ons verslae staan en toekyk, bring Jesus se hart en deernis Hom in beweging! Die vermeerdering van sewe brode en twee visse is die wyse waarop ons Here op hierdie nood reageer.

Iets van die barmhartigheid van God leef voort in die lewe van elke gelowige en sy of haar geloofsgetuienis! Mag die wonder van God se omgeehart ook in jou hart gebeur. Mag ons te alle tye barmhartig bly teenoor alle mense en mag ons deur die werking van die Gees in beweging kom wanneer die nood van ander met ons praat!

Waar daar liefde is, en deernis, daar is God die Heer.
 Ubi caritas et amor, Deus ibi est.
 (Gesang 526)

Dr Frikkie Labuschagne, Sinodaal

Bible Society of South Africav.4.26.9
VOLG ONS