Dagboek 2021 – 5 Augustus

Dit is gewoonlik baie makliker om na ’n storie te luister as jy nie self blootgestel word nie. Dit is makliker om in so ’n geval tot gevolgtrekkings te kom en te oordeel. Jesus gebruik dikwels die tegniek om deur die gelykenisse wat Hy vertel, sy luisteraars so ver te kry om tot beslissings te kom wat eintlik op hulself van toepassing is. Dit kan nogal ’n ontnugtering wees. So is dit ook die geval met hierdie gelykenis.

In die vorige gedeelte is Jesus in ’n twisgesprek betrokke met die priesterhoofde, skrifgeleerdes en familiehoofde oor sy gesag. Hy het hulle uitoorlê in die konfrontasie en nou is hulle waarskynlik nukkerig en vies. Hulle was immers, wanneer Jesus in gelykenisse met hulle begin praat, ’n bietjie gemakliker. Dan gaan dit immers oor iemand anders, sou hulle kon dink.

In die gelykenis speel hebsug ’n oorheersende rol. Die eienaar het ’n goed voorbereide ekonomiese eenheid aan die huurders verhuur. Destyds het baie buitelanders eiendom besit en dit aan die plaaslike bevolking verhuur. Wanneer die eienaar sy huurgeld wil invorder, maak die huurders uit hebsug planne om deur grypsug die eiendom vir hulself op te eis. Kriminele optrede is nou aan die orde van die dag. Hulle slaan en verjaag die slawe of maak hulle dood as hulle die huurgeld kom opeis. Uiteindelik, wanneer die eienaar uit radeloosheid sy seun stuur, maak hulle hom ook dood, met die hoop dat hulle dan die eiendom sal erf.

Wanneer Jesus vir sy opponente vra wat hulle dink die eienaar nou sal doen, antwoord Hy sommer self die vraag en plaas hulle daardeur in die fokus. Hulle is die hebsugtiges wat, deur hul sogenaamde vroomheid, nie net die profete doodgemaak het nie, maar ook vir Jesus wil doodmaak. Dié wat Jesus eintlik moes ondersteun en koester, omdat hulle die ampsdraers in die kerk is, is hulle wat Hom wil doodmaak. Dit laat ’n mens ernstig nadink – die ampsdraers en elke lidmaat moet die warmte van God se liefde uitstraal.

Ds Dries Beukes, Emeritus/Swartkop